Бүгін Түркістан облысының Түлкібас ауданына қарасты Шақпақ баба ауылының маңында орналасқан халықаралық маңызы бар автожол тоннелі ел игілігіге пайдадануға берілді. Салтанатты шараға ҚР Көлік вице-министрі Сәтжан Аблалиев, Түркістан облысы әкімінің бірінші орынбасары Зұлпыхар Жолдасов, Жамбыл облысы әкімнің орынбасары Қанатбек Мәдібек, сала мамандары мен екі облыстың ақсақалдары қатысты.
Маңызды нысанның ашылу салтанатында алғысөз алған Көлік вице-министрі тұрғындарды қуанышымен құттықтап, салада атқарылып жатқан жұмыстарды айтып өтті.
– Бұл – Қазақстанның көлік инфрақұрылымы үшін маңызды оқиға. Еліміздегі алғашқы тоннель. Бүгін ашылғаннан кейін негізгі көлік ағыны Шақпақ Баба елдімекенінің айналма жолына бағытталды. Бұл елді мекеннің ішіндегі жол қауіпсіздігін арттыруға септігін тигізбек. Сонымен қатар нысан қыста жүргізушілердің Шақпақ баба асуында қар құрсауында қалып қоймауына мүмкіндік береді, – деген Сәтжан Аблалиев жол пайдаланушыларына жайлы және қауіпсіз жол тіледі.
Басқосуда Түркістан облысы әкімінің бірінші орынбасары Зұлпыхар Жолдасов құттықтау сөз алып, нысанның маңыздылығына тоқталды.
– Бүгін біз еліміздегі ең маңызды әрі құрылысы күрделі нысанды тапсырғалы тұрмыз. Түркістан облысы мен Жамбыл облысын байланыстыратын автожол тоннелі республикадағы көлемі бойынша ең ұзын тоннель екендігін атап өткім келеді. Мемлекет басшысы Қасым-Жомарт Кемелұлы Қазақстан халқына Жолдауында еліміз Азия мен Еуропаны қосатын әлемдік маңызы бар көлік-тасымал торабына айналу қажеттігін атап өтті. Бүгінгі таңда бұл бағыттағы жұмыстар артқарылуда. Бұл нысанды пайдалануға беру арқылы жол қозғалысының қауіпсіздігі қамтамасыз етіледі және өңірдегі жолаушылар ағыны мен жүк айналымы артып, туризмнің дамуына әсерін тигізеді, – деді Зұлпыхар Жолдасов.
Бұл құрылыс – еліміздегі автомобиль жолдары саласындағы бірегей жоба. Түркістан облысының Шақпақ Баба асуындағы екі жолақты тоннельдің ұзындығы 840 метрді құрайды. Ені – 11 метр, биіктігі – 8 метр.
Қауіпсіздікті қамтамасыз ету мақсатында тоннелдің екі жағында жарықтандыру, желдету, дабыл беру және бағдаршамдарды реттеу үдерістерін басқаратын диспетчерлік пункттер қарастырылған. Сонымен қатар нақты уақыт режимінде тоннельді бақылауға мүмкіндік беретін бейнебақылау және өрттен қорғау жүйелері орнатылған. Тоннелдің жанында жүргізушілер мен жолаушылар үшін жол жөндеу пункті, жанармай құю бекеті, тікұшақ алаңдары және сауда аймақтары қарастырылған.
Автожол тоннелінің ашылуы қарсаңында 100 адам және 15 бірлік арнайы техника жұмылдырып, арнайы оқу-жаттығулары өткендігін атап өткен жөн. Арнайы жаттығулар шеңберінде тоннельдің қауіпсіздік жүйелері, соның ішінде желдету және өрт сөндіру жұмыстары сыналды. Сондай-ақ төтенше жағдай кезінде көлік құралдарын жедел сүйреу және жол-пайдалану техникасының қозғалысын ұйымдастыру бойынша іс-әрекеттер пысықталды.
Іс-шара барысында Көлік вице-министрі Сәтжан Аблалиев осы саланың дамуына елеулі үлес қосып, аянбай еңбек етіп жүрген бір топ азаматқа төсбелгі тағып, Алғыс хаттармен марапаттады.
Жол қозғалысына нұсқаулық берілгеннен кейін, тоннельден автошеру жүріп өтті.
Айта кетейік, облыста 2024 жылы автомобиль жолдары саласын дамытуға республикалық және облыстық бюджеттен 41,4 миллиард теңге бөлініп, құрылыс-жөндеу жұмыстарымен жалпы 1061,3 шақырымды құрайтын жолдар мен көшелер қамтылды. Жыл қорытындысы бойынша 559,6 шақырым жол пайдалануға беріледі деп көзделіп отыр.
2025 жылы Сарыағаш қаласының 102 шақырымдық айналма жолының құрылысы басталады
Осы орайда еске салар маңызды жайт, Түркістан облысында инфрақұрылымды жақсарту, әлеуметтік нысандар салу, жол салу жұмыстары қарқынды жүріп жатыр. Облыс әкімі Дархан Сатыбалдының тапсырмасымен аудан, қалалардың даму жоспары жүйеленіп, тұрғындардың өтініштеріне сай істер атқарылуда. Соның бірі – Сарыағаштағы айналма жол мәселесі.
ҚР Көлік министрлігінің тапсырысымен 2025 жылдан бастап «Сарыағаш қаласы айналма жолын салу» нысанын іске асыру жоспарланып отыр. Жолдың жалпы ұзындығы 102 шақырымды құрайды. Бүгінгі таңда, министрлік тарапынан жобаның техникалық-экономикалық негіздемесіне түзету енгізу бойынша жұмыстар жүргізілуде. Жол құрылысы Қабланбек елді мекенінен басталып Қызыләскер елді мекеніндегі «Б.Қонысбаев» кеден бекетіне дейін жалғасады. Түркістан облысының жолаушылар көлігі және автомобиль жолдары басқармасының мәлімдеуінше, нысаның құрылысы кезінде 9 дана жолайрық, 26 көпір, 5 жер асты өткелі, 11 теміржол өткелі, 4 демалыс алаңы, 1 жол пайдалану телімі және 10 ақылы жол аркасы орнатылады. Бұл жұмыстар халқы тығыз орналасқан оңтүстік аймақтардың экономикалық әлеуетін көтеріп, тұрғындардың өмір сапасын жақсартуға үлес қоспақ.
«ANYQ.KZ»-ақпарат.
