Алдымен Сауран ауданының әкімі Мақсат Таңғатаров Бабайқорған ауылдық округінің тұрғындарымен кездесу өткізді. Бұл кездесу барысында аталған ауылдық округ әкімі Жасұлан Мыңтаев 2024 жылдың қорытынды есебін жасап, ауылдың әлеуметтік-экономикалық жағдайы мен инфрақұрылымдық даму барысы туралы баяндады.
Оның айтуынша, ауылдық округтің дамуында бірқатар өзгерістер орын алған. 2024 жылы ауылда көптеген әлеуметтік және инфрақұрылымдық жобалар жүзеге асырылды. Оның ішінде жолдарды жөндеу, су құбырларын тарту және электрмен қамтамасыз ету жұмыстары бар. Ауыл тұрғындарының тұрмыс деңгейін жақсарту мақсатында ауылдық медициналық пункт пен мектеп ғимараттары жөндеуден өтті.
Атап өтсек, ауылдың басты мәселелерінің бірі — жұмыс орындарының тапшылығы мен жастардың ауылдан көшуі. Осы мәселені шешу үшін Жасұлан Мыңтаев аграрлық секторда жаңа өндіріс орындарын ашу, шағын және орта кәсіпкерлікті дамыту жоспарларын алға тартты. Сонымен қатар, ауылдық жерлерде инфрақұрылымды жақсарту мен өмір сүру сапасын арттыру үшін мемлекет тарапынан қосымша қаржыландыру көздерін тарту мәселесі де талқыланды.
Мақсат Таңғатаров өз сөзінде ауыл әкімінің жұмысына оң баға беріп, ауданның даму жоспарларын жүзеге асыруда жергілікті атқарушы оргектарндармен тығыз ынтымақтастық орнату қажеттігін атап өтті. Сонымен қатар, ауылдағы әрбір тұрғынның тұрмыс деңгейін көтеруге бағытталған мемлекеттік бағдарламалар мен жобаларды белсенді түрде іске асыру маңызды екенін айтты.
Кездесу барысында ауыл тұрғындары да өздерін толғандырған сұрақтарын қойып, ұсыныс-пікірлерін білдірді. Олар, әсіресе, ауылда жұмыс орындарын көбейту жөніндегі бастамаларды күшейтуді сұрады. Жиын соңында Мақсат Таңғатаров және Жасұлан Мыңтаев алдағы уақытта ауыл тұрғындарының ұсыныстарын ескеріп, жұмыс жүргізетінін және Бабайқорған ауылдық округінің дамуы үшін барлық күш-жігерін жұмсайтындарын жеткізді.
Бұдан кейін 2024 жылдың ІІ жартыжылдығында атқарылған шаруалар бойынша Сауран ауданының әкімі Мақсат Таңғатаров Шорнақ ауылдық округінің тұрғындарымен кездесу өткізіп, жыл қорытындысын талқылады. Кездесуде Шорнақ ауылдық округінің әкімі Бердалы Баймұратов 2024 жылдың негізгі нәтижелері мен атқарылған жұмыстар туралы халық алдында есеп берді.
Бердалы Баймұратов өз сөзінде ауылдың әлеуметтік-экономикалық жағдайы, инфрақұрылымдық мәселелер мен тұрғындардың тұрмысын жақсарту бағытында қолға алынған жұмыстарды атап өтті. Ол ауылдағы жыл бойы атқарылған жұмыстарды, сонымен қатар, алдағы уақытта іске асырылуы жоспарланған жобаларды егжей-тегжейлі баяндады.
Шорнақ ауылдық округінде өткен жылы ауыл инфрақұрылымын дамытуға бағытталған бірнеше маңызды шаралар жүзеге асырылды. Атап айтқанда, ауыл ішіндегі жолдарды жөндеу, ауызсу жүйесін жақсарту және электр қуатын тұрақты жеткізу мәселелері шешілді. Сондай-ақ, ауылдық мәдениет үйі мен спорт алаңдарының құрылыс жұмыстары басталып, жастар мен тұрғындар үшін жаңа мүмкіндіктер туғызылды.
Тұрғындардың әлеуметтік жағдайын жақсарту бойынша да бірқатар шаралар атқарылды. Әсіресе, әлеуметтік аз қамтылған және көп балалы отбасыларға көмек көрсету, жұмыссыздық мәселесін шешу бағытында жұмыс орындарын ашу басты назарда болды. Әлеуметтік қолдау көрсету бағдарламалары аясында тұрғындарға қаржылай көмек көрсету, медициналық қызметтерді жетілдіру, сондай-ақ, ауылда жаңа кәсіпорындар ашу бағытында жұмыстар жалғасын тапты.
Бердалы Баймұратов алдағы жылдарда ауылды одан әрі дамыту үшін жаңа жобалар мен бастамалар әзірленгенін айтты. Атап айтқанда, ауылдағы шағын және орта кәсіпкерлікті дамыту үшін арнайы бағдарламалар жүзеге асырылмақ. Сонымен қатар, ауыл шаруашылығының өнімділігін арттыру, аграрлық секторды дамыту үшін мемлекеттік қолдаудың кеңейтілуі жоспарланған.
Сауран ауданының әкімі Мақсат Таңғатаров өз сөзінде Шорнақ ауылдық округінің жетістіктеріне оң бағасын беріп, алдағы уақытта да ауыл тұрғындарының өмір сапасын жақсартуға бағытталған жұмыстардың жалғасатынын атап өтті. Кездесу соңында аудан әкімі мен ауыл әкімінің баяндамаларына сұрақтар қойылып, ауыл тұрғындары өз пікірлері мен ұсыныстарын жеткізді. Аудан әкімі тұрғындардың ұсыныстарына құлақ асып, оларды іске асыру бағытында жергілікті билік тарапынан барлық мүмкіндіктер жасалатынын айтты.
«ANYQ.KZ»-ақпарат.
