Ордабасы ауданының орталығында өңірдің әлеуметтік-экономикалық дамуына серпін беруді мақсат еткен «Нәтижелер жәрмеңкесі» атты ауқымды іс-шара өтті. Шара аудандық Мәдениет үйінде ұйымдастырылып, оған аудан әкімі Азат Оралбаев пен аудандық мәслихаттың төрағасы Бақдәулет Жұмабеков, мәслихат депутаты, “Amanat” партиясының мүшесі Талғат Жанысбаев, сондай-ақ мемлекеттік органдардың өкілдері, жұмыс берушілер мен тұрғындар қатысты.
Жәрмеңкенің басты мақсаты халықты тұрақты жұмыспен қамту, жаңа жұмыс орындарын ашу және кәсіпкерлік белсенділікті арттыру арқылы аудан экономикасын өркендету болып табылады.
Бұл бастама «Еңбек нарығын арттырудың 2024–2029 жылдарға арналған тұжырымдамасы» және «Жұмысшылар жылы» аясында жүзеге асырылуда.
Іс-шара барысында ауданның еңбек нарығындағы нақты жетістіктер мен көрсеткіштер таныстырылды. Атын атап, түсін түстей кетсек. Өңірлік жұмыспен қамту картасы негізінде 2025 жылы 7484 жаңа жұмыс орнын ашу жоспарланған; Биылғы 9 айдың қорытындысы бойынша 7218 жаңа жұмыс орны құрылды; 1541 азамат субсидияланған жұмыс орындарына орналастырылды; Ал «10 мың тұрғынға – 100 жаңа жұмыс орны» бастамасы аясында 2030 жұмыс орны тіркелді.
Жиында аудан басшысы сөз сөйлеп, жұмыспен қамту мен еңбек нарығын дамыту елдің тұрақты өсіміне негіз болатынын атап өтті.
– Жұмыспен қамту – мемлекеттің әлеуметтік саясатының өзегі. Әрбір азаматтың еңбегі мен табысы – ауданның, облыстың және жалпы елдің тұрақты дамуының кепілі. Еңбек адамын қолдау, жұмыс орындарын көбейту – біздің басты міндетіміз, – деді Азат Оралбаев.
Шара барысында өңірдің өркендеуіне үлес қосып, кәсіпкерлік пен еңбек саласында жоғары белсенділік танытқан азаматтарға алғыс хаттар табыс етілді. Жәрмеңке соңында қатысушылар бос жұмыс орындарымен танысып, еңбек және кәсіпкерлікті дамыту бағытындағы мемлекеттік қолдау тетіктері жөнінде кеңес алды.
Алғыс демекші, Ордабасы ауданы әкімдігінің мәжіліс залында ауданның көпбалалы, алтын құрсақты аналары салтанатты түрде марапатталды. Бүгінгі күнде Қазақстан Республикасы Президентінің Жарлығына сәйкес 19 ана «Алтын алқа», 59 ана «Күміс алқа» иегері атанды.
Жалпы ауданда көлемінде 56 «Алтын алқа» және 228 «Күміс алқа» иегері бар.
Салтанатты шара барысында аудан әкімі Азат Оралбаев пен аудандық мәслихаттың төрағасы Бақдәулет Жұмабеков аналарды марапаттап, ізгі тілектерін жеткізді.
– Құрметті алтын құрсақты аналар! Сіздерге деген құрмет ешқашан кемімейді. Мемлекетімізде ана мен баланы қорғауға бағытталған түрлі қолдаулар жүзеге асып келеді. Баланы дүниеге әкеліп, ел азаматы етіп тәрбиелеп отырған еңбектеріңіз зор. Баршаңызға амандық, отбасыларыңызға бақ-береке тілеймін, – деді аудан әкімі.
«ANYQ.KZ»-ақпарат.
