Шымкент қаласының әкімі Ғабит Сыздықбеков халықпен көшпелі кездесу аясында Абай ауданы тұрғындарымен кездесті. Жиынға Самал-2, Ақжайық және Қайнарбұлақ шағынаудандарының тұрғындары қатысып, қалалық ортаның сапасы мен күнделікті тұрмысқа қатысты өзекті мәселелерді көтерді.
Кездесу барысында инженерлік және әлеуметтік инфрақұрылымды дамытуға қатысты ұсыныстар мен өтініштер талқыланды. Атап айтқанда, жаяу жүргіншілер жолдарын салу, жер телімдерін заңдастыру, ерекше қажеттілігі бар азаматтар үшін қолайлы орта қалыптастыру, бағдаршамдар мен жол белгілерін орнату мәселелері көтерілді.
Сонымен қатар тұрғындар саябақ салу, балабақша ашу, балалар және спорт алаңдарын көбейту, қолданыстағы емханаға жаңа ғимарат салу, қоғамдық көліктің қосымша бағыттарын іске қосу және №125 мектепке спорт залын салу жөніндегі ұсыныстарын жеткізді.
Кездесу қорытындысы бойынша қала әкімі аудан әкімі мен салалық басқарма басшыларына тұрғындар көтерген барлық мәселелерді бақылауға алып, әрбір өтініш бойынша нақты шешу тетіктерін айқындауды тапсырды. Сондай-ақ атқарылған жұмыстардың нәтижесі тұрғындарға тұрақты түрде жеткізіліп отыратыны атап өтілді.
Халықпен тұрақты әрі ашық диалог орнату – мемлекеттік басқарудың тиімділігін арттыратын маңызды тетіктердің бірі. Мемлекет басшысы Қасым-Жомарт Тоқаев өз Жолдауларында «Халық үніне құлақ асатын мемлекет» қағидатын жүзеге асырудың маңыздылығын бірнеше рет атап өткен болатын. Осы тұрғыдан алғанда, көшпелі кездесулер тұрғындардың өзекті мәселелерін жергілікті жерде талқылап, оларды шешудің нақты жолдарын айқындауға мүмкіндік береді.
Шымкентте халық саны қарқынды өсіп, бүгінде 1,3 миллионнан асты. Осыған байланысты инженерлік инфрақұрылымға, әлеуметтік нысандарға, қоғамдық көлік пен абаттандыру жұмыстарына сұраныс та артып келеді. Сондықтан тұрғындар көтерген әрбір мәселе қаланың кешенді дамуы тұрғысынан ерекше маңызға ие. Мұндай кездесулер азаматтардың мемлекеттік шешім қабылдау процесіне қатысуын күшейтіп қана қоймай, қаладағы өмір сапасын жақсартуға бағытталған бастамалардың тиімді жүзеге асуына негіз қалайды.
Сонымен қатар, көтерілген ұсыныстардың кезең-кезеңімен жүзеге асырылуы ауданның инфрақұрылымдық әлеуетін арттырып, тұрғындардың өмір сүру сапасын жақсартуға ықпал етеді.
«ANYQ.KZ»-ақпарат.
