Шымкент қаласының әкімі Ғабит Сыздықбеков Еңбекші ауданы тұрғындарымен көшпелі кездесу өткізді. Жиынға Қойкелді батыр көшесі, Оңтүстік, Айнатас және Достық шағынаудандарының тұрғындары қатысып, ауданның дамуына қатысты өзекті мәселелер мен ұсыныстарын жеткізді.
Кездесу барысында жер қатынастары мен ирригациялық жүйелердің жұмысы, инженерлік инфрақұрылым желілерін жүргізу және оларға қосылу мәселелері, трансформаторлық қосалқы станциялардың жай-күйі, сондай-ақ балалар және спорт алаңшаларын салу мәселелері жан-жақты талқыланды.
Сонымен қатар тұрғындарға Көксай шағынауданын жаңғырту тұжырымдамасы мен тұрғын үй қорын жаңғырту бағдарламасының іске асырылу тетіктері түсіндірілді. Ұялы байланыс операторларының базалық станцияларын орнату мен ішкі көшелерді кеңейту, жол белгілері мен жасанды жол кедергілерін орнатуға қатысты сұрақтарға жауап берілді.
Қала әкімі аудан әкімдігі мен жауапты басқармаларға тұрғындардың өтініштерін уақытылы қарап, нақты әрі тиімді шешімдер қабылдау бағытындағы жұмысты күшейтуді тапсырды. Сондай-ақ атқарылатын жұмыстардың барлығы ең алдымен халықтың өмір сүру сапасын арттыруға бағытталуы қажеттігін атап өтті.
Кездесу соңында Ғабит Сыздықбеков тұрғындарға белсенді азаматтық ұстанымы, қаланың дамуына деген жанашырлығы мен сындарлы ұсыныстары үшін алғыс білдірді. Көшпелі кездесу барысында түскен барлық өтініштер жан-жақты зерделеніп, оларды кезең-кезеңімен шешу бойынша тиісті іс-шаралар жоспары әзірленетін болды.
Еңбекші ауданындағы көшпелі кездесу халық пен жергілікті билік арасындағы ашық диалогтың нақты көрінісіне айналды. Инженерлік инфрақұрылым, ирригация, тұрғын үй қорын жаңғырту, көлік және байланыс желілерін дамыту сияқты мәселелердің көтерілуі аудан тұрғындарының өмір сапасын арттыруға деген сұранысының жоғары екенін көрсетті. Мемлекет басшысы Қасым-Жомарт Тоқаев өңірлерді дамытуда тұрғындардың пікіріне сүйеніп, әрбір мәселені нақты нәтижемен шешудің маңызын үнемі атап келеді. Бүгінде елімізде қалалық инфрақұрылымды жаңғырту мен халыққа қолайлы орта қалыптастыру бағытындағы жұмыстар жүйелі түрде жалғасуда. Осы тұрғыдан алғанда, тұрғындардың ұсыныстары негізінде әзірленетін іс-шаралар жоспары Еңбекші ауданының әлеуетін арттырып қана қоймай, Шымкенттің заманауи әрі жайлы мегаполис ретінде дамуына серпін береді. Азаматтардың белсенділігі мен биліктің жауапкершілігі тоғысқан жерде оң өзгерістердің нәтижесі де айқын болмақ.
«ANYQ.KZ»-ақпарат.
