Түркістан қаласының әкімі Әзімбек Пазылбекұлы тұрғындарды жеке мәселелері бойынша кезекті қабылдау өткізді.
Қабылдауға алдын ала жазылған 9 азамат қатысып, жалпы саны 17 мәселе көтерді. Тұрғындар тұрғын үймен қамтамасыз ету, жер қатынастары, әлеуметтік қолдау, мүмкіндігі шектеулі азаматтардың денсаулығына қатысты мәселелер, ауыз су сапасы мен қысымы, көпқабатты тұрғын үйлерді күтіп ұстау, кәсіпкерлікті қолдау, аулаларды абаттандыру, балалар ойын алаңдарын салу, қоқыс контейнерлерін орналастыру, бейнебақылау жүйелерінің жұмысы және коммуналдық қызметтерге қатысты өзекті мәселелерді ортаға салды.
Қала әкімі әрбір азаматтың өтінішін мұқият тыңдап, көтерілген мәселелер бойынша жауапты сала басшылары мен мекеме өкілдеріне нақты тапсырмалар жүктеді. Заңнама аясында шешілуі тиіс мәселелер бойынша тұрғындарға тиісті түсіндірмелер берілді.
Қосымша зерделеуді қажет ететін барлық өтініштер жауапты бөлімдерге жолданып, олардың орындалуы тұрақты бақылауға алынды. Әрбір мәселе қолданыстағы заңнама талаптарына сәйкес қаралып, тиісті шешім қабылданатын болады.
Тұрғындарды жеке қабылдау халық пен жергілікті атқарушы билік арасындағы ашық әрі тиімді байланысты нығайтып, азаматтардың өтініштері мен ұсыныстарына жедел ден қоюға мүмкіндік беретін маңызды алаң болып табылады.
Еске сала кетейік, Түркістан қаласы әкімінің азаматтарды жеке қабылдауы бекітілген кестеге сәйкес әр айдың үшінші сәрсенбісінде өткізіледі. Қабылдауға «Е-Өтініш» ақпараттық жүйесі немесе Азаматтарды қабылдау орталығы арқылы алдын ала жазылуға болады.
Азаматтардың өтініштерін жедел қарап, олармен тікелей кері байланыс орнату – мемлекеттік басқарудың тиімділігін айқындайтын маңызды көрсеткіштердің бірі. Соңғы жылдары Қазақстанда халықпен ашық диалог мәдениетін қалыптастыруға, мемлекеттік органдардың есептілігі мен ашықтығын арттыруға ерекше көңіл бөлініп келеді. Мемлекет басшысы Қасым-Жомарт Тоқаев мемлекеттік аппараттың басты міндеті – азаматтардың мұң-мұқтажына құлақ асып, көтерілген мәселелерді заң аясында уақтылы әрі сапалы шешу екенін үнемі айтып келеді. Осыған сәйкес елімізде «Халық үніне құлақ асатын мемлекет» тұжырымдамасы кезең-кезеңімен іске асырылып, «Е-Өтініш» жүйесі арқылы азаматтардың арыз-өтініштерін қараудың ашық әрі тиімді тетігі қалыптасты. Түркістан қаласында тұрғындарды тұрақты қабылдау, олардың ұсыныстары мен талап-тілектерін назарға алып, нақты шешімдер қабылдау осы қағидаттың жергілікті деңгейде жүйелі жүзеге асып жатқанын көрсетеді.
«ANYQ.KZ»-ақпарат.
