Сауран ауданының әкімі Мақсат Таңғатаровтың төрағалық еткен аппараттық мәжілісте ауданның әлеуметтік-экономикалық дамуына, елді мекендердің сәулеттік келбетін қалыптастыруға және мемлекеттік басқару тиімділігін арттыруға қатысты өзекті мәселелер қаралды. Мәжіліске аудан әкімдігіне қарасты бөлім басшылары мен жауапты сала жетекшілері қатысты.
Күн тәртібіндегі алғашқы мәселе бойынша аудандағы елді мекендердің сәулеттік келбетін жүйелеу және заңсыз құрылыс нысандарының алдын алу бағытында атқарылып жатқан жұмыстар талқыланды. Бұл жөнінде Құрылыс, сәулет және қала құрылысы бөлімінің басшысының орынбасары Сұлтанмұрат Нұрмұхаммед баяндама жасап, қолданыстағы талаптардың сақталуы мен бақылау шаралары туралы мәлімет берді.
Мәжілісте сондай-ақ Отбасының цифрлық картасы ақпараттық жүйесіндегі D және E санатындағы отбасылардың санын азайтуға бағытталған жұмыстардың барысы қаралды. Жұмыспен қамту және әлеуметтік бағдарламалар бөлімінің басшысы Асылбек Дауырхан атқарылып жатқан іс-шаралар мен алдағы міндеттерге тоқталып, әлеуметтік қолдау тетіктерінің тиімділігін арттыру бағытындағы жұмыстар жөнінде баяндады.
Күн тәртібіндегі үшінші мәселе аясында орындаушылық тәртіптің сақталуы және аудан аумағында анықталған кемшіліктер сөз болды. Ұйымдастыру-инспекторлық жұмыс және аумақтық даму бөлімінің басшысы Шәми Мағжан атқарылған мониторинг нәтижелерін таныстырып, анықталған кемшіліктерді жою бойынша қабылданып жатқан шаралар туралы ақпарат берді.
Аппараттық мәжілісті қорытындылаған аудан әкімі қаралған мәселелердің әрқайсысы бойынша нақты тапсырмалар беріп, жауапты бөлім басшыларына белгіленген міндеттердің сапалы әрі уақытылы орындалуын қамтамасыз етуді тапсырды.
Мемлекет басшысы Қасым-Жомарт Тоқаев мемлекеттік басқарудың тиімділігін арттыру, халыққа жайлы өмір сүру ортасын қалыптастыру және әлеуметтік саясаттың атаулылығын күшейту – барлық деңгейдегі әкімдердің басты міндеті екенін үнемі айтып келеді. Президент тапсырмасына сәйкес бүгінде елімізде мемлекеттік қызметтерді цифрландыру, азаматтардың әл-ауқатын бағалауға арналған Отбасының цифрлық картасы жүйесін жетілдіру және өңірлердің инфрақұрылымын дамыту бағытындағы жұмыстар жүйелі жалғасуда. Бұл жүйе арқылы бүгінде миллиондаған қазақстандық отбасының әлеуметтік жағдайы автоматты түрде сараланып, мемлекеттік қолдау шаралары проактивті форматта ұсынылуда. Осындай міндеттердің Сауран ауданында аппараттық мәжілістерде тұрақты қаралып, сәулеттік тәртіпті сақтау, әлеуметтік осал отбасылардың санын азайту, орындаушылық тәртіпті күшейту және басқару сапасын арттыруға басымдық берілуі – өңірдің тұрақты дамуына бағытталған жүйелі жұмыстың көрінісі. Нәтижеге негізделген мұндай басқару тәсілі ауданның әлеуметтік-экономикалық әлеуетін нығайтып, тұрғындардың өмір сүру сапасын жақсартуға қызмет етпек.
«ANYQ.KZ»-ақпарат.
