Түркістан қаласының әкімі Әзімбек Пазылбекұлының төрағалығымен өткен кезекті лездемелік мәжілісте құрылыс саласындағы өзекті мәселелер, қаланы көгалдандыру жұмыстарының барысы және мониторинг нәтижесінде анықталған кемшіліктер қаралды.
Жиында алдымен Жаңа қала шағынауданындағы көпқабатты тұрғын үйлердің жай-күйі, кепілдік мерзімі аяқталған үйлердегі кемшіліктерді жою, мердігер мекемелердің міндеттемелерін орындауы, бөлім теңгеріміндегі нысандар мен өрт қауіпсіздігі жүйелерінің жағдайы талқыланды. Сондай-ақ сотқа жолданған талап-арыздардың орындалу барысы сараланды.
Сонымен қатар, қаладағы көгалдандыру жұмыстарының сапасы, ағаш және бұта көшеттерін күтіп-баптау, суару жүйелерінің тиімділігі мен абаттандыру нысандарының қазіргі жай-күйі қаралды. Бұдан бөлек, қала аумағында жүргізілген мониторинг барысында анықталған кемшіліктер мен оларды жою бағытындағы жұмыстар бойынша жауапты бөлімдердің есебі тыңдалды.
Қала әкімі кепілдік мерзімі аяқталған тұрғын үйлер бойынша нақты шешімдер қабылдап, мердігер мекеме тарапынан орын алған кемшіліктерді жедел қалпына келтіруді, сондай-ақ, көгалдандыру мен абаттандыру жұмыстарының сапасын күшейтуді, тапсырмалардың орындалуын тұрақты баяндауды тапсырды.
Иә, Мемлекет басшысы Қасым-Жомарт Тоқаев қалалардың сапалы әрі жүйелі дамуы тұрғындардың өмір сүру деңгейін арттырудың негізгі көрсеткіші екенін үнемі атап келеді. Президенттің тапсырмасына сәйкес Үкімет құрылыс сапасын бақылауды күшейтуге, тұрғын үй қорын тиімді басқаруға, елді мекендерді көгалдандыруға және жайлы қалалық ортаны қалыптастыруға басымдық беріп отыр. Осы бағытта құрылыс нысандарына авторлық және техникалық қадағалау талаптары күшейтіліп, мердігерлердің кепілдік міндеттемелерін орындауына бақылау артып келеді.
Ерекше мәртебеге ие Түркістан қаласы үшін бұл талаптардың маңызы тіпті жоғары. Қалада жаңа тұрғын үй кешендерінің сапасын бақылау, инженерлік инфрақұрылымды жетілдіру, жасыл желек қорын көбейту және қоғамдық кеңістіктерді күтіп ұстау жұмыстары жүйелі жүргізілуде. Президенттің бастамасымен жүзеге асып жатқан «Таза Қазақстан» бағдарламасы аясында көгалдандыру мен абаттандыруға ерекше көңіл бөлініп, экологиялық мәдениетті қалыптастыруға басымдық берілуде. Сондықтан құрылыс сапасы мен көгалдандыру мәселелерін тұрақты бақылауда ұстау – Түркістанның сәулеттік келбетін сақтап қана қоймай, оны халықаралық деңгейдегі туристік әрі жайлы қала ретінде дамытуға қызмет ететін маңызды міндет.
«ANYQ.KZ»-ақпарат.
