Созақ аудан әкімдігінің кәсіпкерлік және ауылшаруашылығы бөлімі, жер қатынастары бөлімі, Кәсіпкерлер кеңесі, «Атамекен» өңірлік кәсіпкерлер палатасы Созақ аудандық филиалының басшыларымен Жартытөбе ауыл әкімшілігіне қарасты игерілмей жатқан ауыл шаруашылығы жер учаскелері бойынша мониторинг жүргізілді.
Мониторинг жұмыстары барысында игерілмей жатқан жер учаскелері егелеріне жер қатыныстары бөлімі заң шеңберінде ұсыныс хаттар мен ескертулер жіберілетін болды.
Жер – мемлекеттің стратегиялық ресурсы әрі ауыл экономикасының негізгі өндіріс құралы. Сондықтан ауыл шаруашылығы мақсатындағы жерлердің тиімді әрі мақсатты пайдаланылуын қамтамасыз ету – еліміздің азық-түлік қауіпсіздігін нығайтудың, инвестиция тартудың және ауылдық аумақтарды дамытудың маңызды тетігі. Мемлекет басшысы Қасым-Жомарт Тоқаев бірнеше рет пайдаланылмай жатқан және заң талаптарына сай игерілмеген ауыл шаруашылығы жерлеріне қатысты бақылауды күшейтіп, мұндай жерлер экономикалық айналымға қайтарылуы тиіс екенін нақты тапсырған болатын. Президенттің бұл ұстанымы жердің шын мәнінде еңбек етіп, өнім өндіруге дайын азаматтарға қызмет етуі қажет деген қағидатқа негізделген.
Осы тапсырмаларға сәйкес Үкімет соңғы жылдары жер қатынастары саласында ауқымды реформалар жүргізді. Пайдаланылмай жатқан ауыл шаруашылығы жерлерін анықтау, оларды мемлекет меншігіне қайтару және қайтадан тиімді пайдаланушыларға беру жұмыстары жүйелі түрде жалғасуда. Сонымен қатар жер ресурстарын цифрландыру, ғарыштық мониторинг технологияларын пайдалану, электрондық жер кадастрын жетілдіру және жерді пайдалануға мемлекеттік бақылауды күшейту бағытындағы жұмыстар кезең-кезеңімен жүзеге асырылып келеді. Бұл шаралар жер ресурстарын ашық әрі тиімді басқаруға мүмкіндік беруде.
Түркістан облысында да ауыл шаруашылығы жерлерін тиімді пайдалану мәселесі ерекше бақылауда. Аграрлық әлеуеті жоғары өңір ретінде облыста пайдаланылмай жатқан жерлерді анықтау, оларды ауыл шаруашылығы айналымына қайтару, суармалы жер көлемін ұлғайту және жаңа инвестициялық жобаларды орналастыру бағытында жүйелі жұмыстар жүргізілуде. Бұл өңірдің ауыл шаруашылығы өнімдерінің көлемін арттыруға, жаңа жұмыс орындарын ашуға және ауыл тұрғындарының әл-ауқатын жақсартуға ықпал етіп отыр.
Созақ ауданында Жартытөбе ауылдық округі аумағында жүргізілген мониторинг те осы мемлекеттік саясаттың жергілікті деңгейдегі нақты жалғасы. Аудан әкімдігі, жер қатынастары бөлімі, кәсіпкерлер қауымдастығы және «Атамекен» кәсіпкерлер палатасы өкілдерінің бірлескен жұмысы жерді пайдалану мәселесінде мемлекеттік бақылау мен бизнес қауымдастығының өзара ықпалдастығы күшейіп келе жатқанын көрсетеді. Игерілмей жатқан жер телімдерінің иелеріне заңнама талаптарына сәйкес ескерту хаттарының жолдануы – ең алдымен жерді тиімді игеруге мүмкіндік беру әрі заң талаптарының сақталуын қамтамасыз етуге бағытталған құқықтық тетік.
Жердің әр гектары ел игілігіне жұмыс істеуі тиіс. Өйткені пайдаланылмай бос жатқан жер – жоғалған мүмкіндік, ал тиімді игерілген жер – жаңа өнім, жаңа жұмыс орны, жаңа инвестиция және ауылдың тұрақты дамуы. Сондықтан Созақ ауданында жүргізіліп жатқан мониторинг жұмыстары тек заң талаптарының орындалуын бақылау ғана емес, ауданның аграрлық әлеуетін толық пайдалану мен ауыл шаруашылығы өндірісінің тиімділігін арттыруға бағытталған маңызды қадам болып табылады. Бұл жұмыстар Президент айқындаған жер реформасының негізгі мақсатына – жердің халық игілігіне қызмет етуіне және ауыл экономикасының тұрақты дамуына нақты үлес қоса беретіні сөзсіз.
«ANYQ.KZ»-ақпарат.
