Шымкент қаласы әкімдігінде азаматтарды жеке мәселелері бойынша кезекті қабылдау өтіп, тұрғындардың өтініштері мен ұсыныстары қаралды. Қала әкімі Ғабит Сыздықбеков аудан әкімдері мен басқарма басшыларымен бірге 180-нен астам азаматтың мәселесін тыңдады.
Қабылдауға келген тұрғындар өздерін толғандырған әлеуметтік және тұрмыстық мәселелерді көтеріп, оларды шешуге ықпал етуді сұрады. Өтініштердің басым бөлігі тұрғын үймен қамтамасыз ету, қоғамдық көліктің жұмысы, білім беру, энергетика және кәсіпкерлікті қолдау бағыттарына қатысты болды.
Әрбір мәселе жеке тәртіппен қаралып, азаматтарға қолданыстағы заңнама аясында қажетті түсіндірмелер берілді. Қосымша зерделеуді және тиісті жұмыстар жүргізуді қажет ететін өтініштер жауапты сала басшыларының бақылауына алынды. Азаматтарға өтініштерінің қаралу нәтижесі мен қабылданған шаралар туралы ақпарат берілетін болады.
Азаматтарды жеке қабылдау – тұрғындардың талап-тілегін тікелей тыңдап, мәселелерді жедел шешуге мүмкіндік беретін маңызды тетік. Мұндай кездесулерде көтерілген ұсыныстар қаланың әлеуметтік-экономикалық дамуына қатысты шешімдерді жетілдіруге де негіз болады.
Қабылдау қорытындысы бойынша қала әкімі аудан әкімдері мен басқарма басшыларына әрбір өтініштің сапалы әрі уақтылы қаралуын қамтамасыз етуді тапсырды. Сонымен қатар тұрғындар тарапынан айтылған ұсыныстар мен бастамаларды алдағы шешімдер қабылдау кезінде ескеріп, нақты нәтижеге бағытталған жұмыстар жүргізу қажеттігін атап өтті.
Шымкент әкімдігі үшін тұрғындармен ашық диалог орнату және азаматтардың өтініштеріне нақты жауап беру қалалық басқарудың маңызды бағыттарының бірі болып қала береді.
«ANYQ.KZ»-ақпарат.
