Шымкентте аға буын өкілдерінің денсаулығын нығайтып, белсенді әрі сапалы өмір сүруіне жағдай жасауға бағытталған әлеуметтік қолдау жүйесі дамып келеді. Соның маңызды тетіктерінің бірі – Жұмыспен қамту және әлеуметтік қорғау басқармасына қарасты «Ізетті Зейнеткер» коммуналдық мемлекеттік мекемесі. Мұнда зейнеткерлерге медициналық сауықтырумен қатар, мазмұнды демалыс пен әлеуметтік ортаға белсенді араласуға мүмкіндік беретін кешенді қызмет көрсетіледі.
2026 жылдың алғашқы жеті айында орталықта 1 920 зейнеткер ем алып, сауықтыру процедураларынан өткен. Мұнда келген әр азамат алдымен дәрігерлік тексеруден өтеді. Мамандар оның денсаулық жағдайын, жас ерекшелігін және жеке қажеттіліктерін ескере отырып, тиісті емдеу-сауықтыру шараларын белгілейді. Бұл тәсіл әр ем алушыға қажетті қызмет түрін нақты таңдауға мүмкіндік береді.
Орталықта барлығы 26 түрлі процедура қарастырылған. Олардың қатарында физиотерапия, массаж, емдік дене шынықтыру, сумен емдеу, магниттік және электротерапия, ингаляция, фитотерапия, тұзды шахта секілді сауықтыру қызметтері бар. Негізгі мақсат – ағзаны қалпына келтірумен қатар, қимыл-қозғалыс белсенділігін арттырып, егде жастағы азаматтардың күнделікті өмірге белсенді араласуына қолдау көрсету.
Алайда «Ізетті Зейнеткердің» ерекшелігі тек медициналық қызметпен шектелмейді. Орталықта аға буын өкілдерінің психологиялық жай-күйі мен әлеуметтік белсенділігіне де мән беріледі. Ем алушылар үшін музыка терапиясы ұйымдастырылып, шахмат, дойбы, үстел теннисі сияқты мәдени-спорттық шаралар өткізіледі. Мұндай орта зейнеткерлердің бос уақытын тиімді өткізуіне, өзара араласуына және жаңа достық байланыстар орнатуына мүмкіндік береді.
Күнделікті тұрмысқа қажетті жағдай да жасалған. Ем алушылар күніне төрт мезгіл ыстық тамақпен қамтамасыз етіледі. Орталықта санитарлық талаптардың сақталуы, жайлылық пен қауіпсіздік тұрақты бақылауда ұсталады. Яғни мұнда зейнеткердің денсаулығы ғана емес, оның көңіл күйі мен күнделікті тұрмыс сапасы да назардан тыс қалмайды.
Әлеуметтік қызмет көрсету саласында цифрландыруға да басымдық берілуде. Шымкент тұрғындары санаторлық-курорттық ем алуға кезекке онлайн тұрып, өтінішін қашықтан бере алады. Ол үшін geo-shym.kz порталы арқылы қажетті қызметті таңдап, кезектегі орнын бақылауға мүмкіндік бар. Бұл азаматтардың уақытын үнемдеп, әлеуметтік қызметтерді алуды жеңілдетуге бағытталған.
«Ізетті Зейнеткер» орталығының жұмысы – қоғамның аға буынға деген құрметінің нақты көрінісі. Мұнда ем мен демалыс, денсаулық пен әлеуметтік белсенділік өзара сабақтасып, зейнеткерлердің өздерін қоғамның белсенді мүшесі ретінде сезінуіне жағдай жасалған. Осындай қолдау аға ұрпақтың өмір сапасын арттырып қана қоймай, олардың жинаған тәжірибесі мен өмірлік өнегесін кейінгі буынмен бөлісуіне мүмкіндік беретін маңызды әлеуметтік орта қалыптастырады.
«ANYQ.KZ»-ақпарат.
