Шымкент халықаралық әуежайының инфрақұрылымын дамыту мақсатында екінші ұшу-қону жолағының құрылысы жүргізілуде. Жобаны жалғастыруға қосымша 23,5 миллиард теңге бөлінді. Жаңа жолақ әуежайдың өткізу мүмкіндігін арттырып, жолаушылар мен жүк тасымалын дамытуға және әуе айлағының үздіксіз жұмысын қамтамасыз етуге мүмкіндік береді.
Құрылыс жұмыстары 2025 жылдың қазан айынан бері жүргізіліп келеді. Жобада ұзындығы 3 900 метр, ені 75 метр болатын ұшу-қону жолағын салу көзделген. Бұл әуежайдың ауыр жолаушылар және жүк ұшақтарын қабылдау мүмкіндігін кеңейтуге жол ашады.
Екінші жолақтың қажеттілігі қолданыстағы инфрақұрылымның жағдайымен де байланысты. Қазіргі ұшу-қону жолағы соңғы рет 2007 жылы күрделі жөндеуден өткен. Кезекті жөндеу жұмыстарын 2027 жылы жүргізу қажеттігі туындап отыр. Мұндай жұмыстар әуежай қызметіне уақытша шектеу енгізуге әкелуі мүмкін. Сонымен қатар Қазақстанның авиациялық әкімшілігі қолданыстағы жолақты ұзарту жөнінде нұсқама берген.
Жаңа ұшу-қону жолағы әуежайдың жұмысын тоқтатпай, инфрақұрылымды кезең-кезеңімен жаңғыртуға мүмкіндік береді. Яғни бір жолақта жөндеу немесе өзге де техникалық жұмыстар жүргізілген кезде екіншісі әуе кемелерін қабылдау үшін пайдаланылуы мүмкін. Бұл әуе қатынасының тұрақтылығын сақтауға және рейстердің үзіліссіз орындалуына ықпал етеді.
Жоба аясында жаңа жолақты заманауи жарық-сигналдық жабдықтармен жарақтандыру қарастырылған. Халықаралық стандарттар талаптарына сәйкес келетін жүйелер күрделі метеорологиялық жағдайларда және көріну қашықтығы шектелген кезде әуе кемелерін қауіпсіз қабылдауға жағдай жасайды.
Екінші ұшу-қону жолағының іске қосылуы Шымкент әуежайының жолаушылар және жүк авиациясындағы мүмкіндіктерін кеңейтуге бағытталған. Атап айтқанда, ауыр әуе кемелеріне қызмет көрсету, халықаралық жүк тасымалын дамыту және транзиттік әлеуетті арттыру үшін қосымша мүмкіндік қалыптасады.
Жалпы, жоба әуежайдың тек техникалық инфрақұрылымын жетілдірумен шектелмейді. Оның жүзеге асуы әуе қатынасының тұрақтылығын қамтамасыз етуге, тасымал көлемін ұлғайтуға және Шымкенттің өңірлік көлік-логистикалық орталық ретіндегі маңызын арттыруға ықпал етуі тиіс.
«ANYQ.KZ»-ақпарат.
