![]()
Шымкентте тұрғын үй жағдайын жақсартуды қажет ететін азаматтарды баспанамен қамтамасыз ету жұмысы жүйелі түрде жалғасуда. Кезекті тұрғын үй бағдарламасы аясында Асар-2 шағынауданынан тағы 25 отбасы пәтерлі болды. Жаңа баспаналар сатып алу құқығымен жалға беріліп, тұрғындарға жеке үйге қол жеткізуге қосымша мүмкіндік жасалды.
Бүгін «QYZGALDAQ» сарайында өткен салтанатты рәсімге Шымкент қаласының әкімі Ғабит Сыздықбеков қатысты. Баспаналы болғандардың қатарында мүгедектігі бар азаматтар, ерекше балаларды тәрбиелеп отырған отбасылар, көпбалалы және толық емес отбасылар, жалғызбасты аналар, сондай-ақ жетім және ата-анасының қамқорлығынсыз қалған балалар бар.
Сатып алу құқығымен жалға берілетін тұрғын үй әлеуметтік қолдауды қажет ететін азаматтар үшін маңызды мүмкіндік саналады. Бұл тетік отбасыларға бірден баспана сатып алмай-ақ, белгілі бір шарттар негізінде тұрғын үйге қол жеткізуге жол ашады. Әсіресе, әлеуметтік осал санаттағы азаматтар үшін мұндай қолдау тұрмыс тұрақтылығын қамтамасыз етуде айрықша маңызға ие.
Қалада тұрғын үймен қамту бағытындағы жұмыстар халықтың әртүрлі санатының қажеттіліктерін ескере отырып жүргізілуде. Баспана мәселесін шешу тек тұрғын үй қорын көбейтумен шектелмей, оны азаматтар үшін қолжетімді ететін тетіктерді іске асыруды да көздейді. Осы тұрғыда сатып алу құқығымен жалға беру бағдарламасы тұрғындардың жеке баспаналы болуына мүмкіндік беретін бағыттардың бірі болып отыр.
Айта кетейік, бұған дейін, 29 қазанда, Шымкентте жеңілдетілген шарттармен тағы 30 отбасыға пәтер кілттері табысталған болатын. Салтанатты рәсімге қала әкімі Ғабит Сыздықбеков қатысқан. Пәтерлер Ақжайық, Бозарық және Асар-2 шағынаудандарында орналасқан. Үйлер пайдалануға беріліп, қажетті инженерлік желілерге қосылған және белгіленген құрылыс талаптарына сай келеді. Баспаналар төлем қабілеттілігін растаған азаматтарға ұсынылды. Олардың қатарында мүгедектігі бар адамдар, көпбалалы және толық емес отбасылар, сондай-ақ бюджеттік ұйымдардың қызметкерлері бар.
Осылайша, қысқа мерзім ішінде қалада 55 отбасы баспаналы болу мүмкіндігіне ие болды. Шымкент қаласының әкімдігі тұрғын үй қорын дамыту, жеңілдетілген бағдарламаларды жүзеге асыру және баспананың қолжетімділігін арттыру бағытындағы жұмысты алдағы уақытта да жалғастырады.
“ANYQ.KZ”-ақпарат.
