Халықтың тұрмыс сапасын арттыру тек әлеуметтік төлемдерді көбейтумен ғана өлшенбейді. Тұрақты жұмыс орындарын ашу, қолайлы өмір сүру ортасын қалыптастыру, инженерлік инфрақұрылымды дамыту және мемлекеттік бағдарламаларды сапалы іске асыру – азаматтардың әл-ауқатын жақсартудың негізгі факторларының бірі. Сондықтан елімізде жүзеге асырылып жатқан әлеуметтік-экономикалық саясатта құрылыс саласын дамытуға ерекше басымдық беріліп келеді.
«2029 жылға дейінгі халықтың кірісін арттыру бағдарламасында» да өңірлердің экономикалық әлеуетін күшейту, жаңа жұмыс орындарын құру және инвестициялық жобаларды көбейту негізгі міндеттердің бірі ретінде айқындалған. Бұл міндеттердің орындалуы құрылыс саласының қарқынды дамуымен де тығыз байланысты. Себебі әрбір жаңа нысан – құрылысшыларды, инженерлерді, жобалаушыларды, сәулетшілерді және қызмет көрсетуші мамандарды жұмыспен қамтуға мүмкіндік береді.
Осы бағыттағы жұмыстар Отырар ауданында да кезең-кезеңімен жүзеге асырылып келеді. Аудан көлемінде әлеуметтік және инженерлік инфрақұрылымды дамыту, елді мекендердің сәулеттік келбетін жақсарту, тұрғындарға қолайлы орта қалыптастыру мәселелері тұрақты бақылауда. Мұндай жұмыстар бір жағынан халықтың өмір сүру сапасын арттырса, екінші жағынан еңбек нарығының дамуына оң ықпал етеді.
Аталған мәселелер аудан әкімі Қайрат Жолдыбайдың төрағалығымен өткен кезекті аппараттық мәжілісте жан-жақты талқыланды. Мәжіліске аудан әкімінің орынбасарлары, ауылдық округ әкімдері, бөлім және мекеме басшылары қатысып, ауданның әлеуметтік-экономикалық дамуына қатысты өзекті мәселелер қаралды.
Күн тәртібіндегі алғашқы мәселе бойынша құрылыс, сәулет және қала құрылысы бөлімінің басшысы Мұрат Есінбек аудан аумағында атқарылып жатқан құрылыс жұмыстары жөнінде баяндама жасады. Онда әлеуметтік және инфрақұрылымдық нысандардың жүзеге асырылу барысы, елді мекендерді абаттандыру, сәулеттік келбетін жақсарту және құрылыс жобаларының орындалуы туралы кеңінен мәлімет берілді.
Құрылыс саласының дамуы тұрғындардың өмір сапасын жақсартумен қатар, жергілікті еңбек нарығына да серпін береді. Жаңа әлеуметтік нысандардың, инженерлік желілердің және инфрақұрылымдық жобалардың жүзеге асырылуы құрылыс мамандарына, техникалық қызметкерлерге және түрлі саладағы жұмысшыларға сұранысты арттырады. Бұл өз кезегінде аудан тұрғындарының жұмыспен қамтылуына және тұрақты табыс көздерінің қалыптасуына ықпал етеді.
Мәжілісте қаралған екінші мәселе – хаттамалық тапсырмалардың орындалу барысы болды. Ұйымдастыру-инспекторлық жұмыс және аумақтық даму бөлімінің басшысы Мұраділ Қизбаев берілген тапсырмалардың орындалу деңгейіне тоқталып, жауапты мекемелердің жұмыс нәтижелерін саралады. Мемлекеттік бағдарламалардың уақытылы әрі сапалы орындалуын бақылау – халыққа көрсетілетін қызметтердің тиімділігін арттырудың маңызды тетігі екені атап өтілді.
Жиын қорытындысында аудан әкімі Қайрат Жолдыбай барлық жоспарланған жұмыстардың сапасына ерекше назар аударып, жауапты бөлімдер мен мекемелерге нақты тапсырмалар жүктеді. Әсіресе құрылыс нысандарын белгіленген мерзімде аяқтау, инфрақұрылымдық жобалардың сапасын қамтамасыз ету және хаттамалық тапсырмалардың орындалуын тұрақты бақылауда ұстау міндеттелді.
Бүгінде мемлекеттік басқарудың тиімділігі нақты нәтижемен бағаланады. Инфрақұрылымның жақсаруы – тұрғындарға қолайлы орта қалыптастырады, инвестиция тартуға мүмкіндік береді және жаңа жұмыс орындарының ашылуына негіз қалайды. Сондықтан Отырар ауданында құрылыс саласын жүйелі дамыту, мемлекеттік бағдарламалардың орындалуын үйлестіру және әлеуметтік жобалардың сапасын арттыру бағытындағы жұмыстар халықтың әл-ауқатын көтеруге бағытталған кешенді мемлекеттік саясаттың маңызды бөлігі болып қала береді.
«ANYQ.KZ»-ақпарат.
