Шымкент қаласының әкімі Ғабит Сыздықбеков халықпен көшпелі кездесуді Әл-Фараби ауданында жалғастырды. Кездесуге Қабанбай батыр және Жангелдин көшелерінің, 21-шағынаудан мен Береке тұрғын алабының тұрғындары қатысып, ауданның дамуы мен халықтың өмір сүру сапасын арттыруға қатысты өзекті мәселелерді көтерді.
Тұрғындар қоғамдық кеңістіктерді абаттандыру және күтіп ұстау, кәсіпкерлік нысандары мен дренаж жүйелерінің жұмысы, сондай-ақ тұрғын үй мен жер телімдерін беру кезектілігіне байланысты ұсыныстары мен өтініштерін жеткізді. Кездесу барысында тұрғын үй қорын жаңғырту бағдарламасын іске асыру тетіктері түсіндіріліп, қоғамдық қауіпсіздікті қамтамасыз ету, ауыл шаруашылығы жәрмеңкелерін ұйымдастыру және автотұрақ орындарын реттеу мәселелері бойынша қойылған сұрақтарға жауап берілді.
Сонымен қатар табиғи газға заңсыз қосылу фактілері, қоғамдық көліктердің қозғалыс кестесі, емхана ғимаратын кеңейту және балабақша салу мәселелері қаралды. Көтерілген мәселелердің басым бөлігі бойынша жедел шешімдер қабылданды.
Қалған ұсыныстар мен өтініштер салалық басқармалардың жұмыс жоспарына енгізіліп, аумақты дамыту бағдарламаларын әзірлеу барысында ескерілетін болады. Қала әкімі тұрғындарға белсенді азаматтық ұстанымы, сындарлы ұсыныстары және қаланың дамуына қосып жүрген үлесі үшін алғысын білдірді.
Атап өтерлігі, Қазақстанда халықтың мемлекеттік шешімдер қабылдау үдерісіне қатысуын кеңейту бағытында жүйелі жұмыстар жүргізілуде. Президент тапсырмасымен жүзеге асырылып жатқан «Халық үніне құлақ асатын мемлекет» тұжырымдамасы аясында өңірлерде тұрғындармен тікелей кездесулер өткізу тәжірибесі күшейді. Бүгінде елімізде халықтың өмір сүру сапасын жақсартуға бағытталған инфрақұрылымдық және әлеуметтік жобалар қарқынды жүзеге асырылуда. Ұлттық статистика бюросының мәліметінше, Қазақстан халқының 63 пайыздан астамы қалаларда тұрады, бұл өз кезегінде тұрғын үй, көлік, инженерлік инфрақұрылым және қоғамдық қауіпсіздік мәселелерінің өзектілігін арттырып отыр. Осы тұрғыдан алғанда, жергілікті тұрғындардың ұсыныстары мен талап-тілектерін ескере отырып қабылданатын шешімдер қалалардың тұрақты дамуына негіз қалайды. Әл-Фараби ауданындағы көшпелі кездесу де осы бағыттағы жұмыстың нақты көрінісі болып, азаматтардың өзекті мәселелерін дер кезінде көтеруге және оларды шешудің тиімді жолдарын айқындауға мүмкіндік берді. Мұндай ашық диалог тұрғындар сенімін нығайтып қана қоймай, мегаполистің жан-жақты дамуына серпін береді.
«ANYQ.KZ»-ақпарат.
