Шымкент қаласының әкімі Ғабит Сыздықбеков қаланы аралау барысында «Теріскей» шағынауданында орналасқан №46 мектеп-лицей ғимаратының күрделі жөндеу жұмыстарымен танысты. Қазіргі таңда нысанда ішкі әрлеу жұмыстары жүргізіліп, қасбеті мен шатыры жаңартылуда. Мердігер ұйымға құрылыс қарқынын күшейту тапсырылды.
Сонымен қатар Бозарық шағынауданында 30 отбасыға жаңа пәтер кілтін табыстау рәсімі өтті. Пәтерлер «Отбасы банк» АҚ-ның «2-10-20» және «5-10-20» бағдарламалары аясында төлем қабілеттілігін растаған азаматтарға берілді.
Қала әкімі жаңа қоныс иелерін қоныс тойымен құттықтап, тұрғын үйлерді сапалы күтіп-ұстау және ортақ мүлікті тиімді басқару үшін мүлік иелерінің бірлестігін (МИБ) құрудың маңыздылығына тоқталды. Бұл тұрғындардың жауапкершілігін арттырып, қолайлы өмір сүру ортасын қалыптастыруға мүмкіндік береді.
Баспана үй кезегінде тұрған азаматтарға жалға беру шартымен ұсынылып отыр. Жаңа үйлер барлық құрылыс нормалары мен сапа талаптарына сай пайдалануға берілген. Пәтерлерді табыстау заңнамаға сәйкес жүзеге асырылып, «Отбасы банк» АҚ-ның «2-10-20» және «5-10-20» бағдарламаларына қатысқан, төлем қабілеттілігін растаған азаматтар арасында бөлінді.
Айта кету керек, баспана алғандардың қатарында көп балалы және толық емес отбасылар, ерекше балаларды тәрбиелеп отырған жанұялар, мүгедектігі бар азаматтар, сондай-ақ, бюджет саласының қызметкерлері бар. Жобаны жүзеге асырудың басты мақсаты – баспана қолжетімділігін арттыру, кезекте тұрған азаматтарды қолдау және Мемлекет басшысының тапсырмалары аясында жайлы қалалық ортаны дамыту.
Бұдан бөлек шаһар басшысы Абай ауданындағы К. Қасымұлы атындағы №82 жалпы білім беретін мектепте салынып жатқан 450 орындық қосымша ғимараттың құрылысын тексерді. Жоба оқушыларға қолайлы жағдай жасап, білім беру инфрақұрылымын дамытуға бағытталған. Құрылыс басқармасына атқарылып жатқан жұмыстардың сапасына бақылауды күшейтіп, нысанды жаңа оқу жылы басталғанға дейін уақытылы пайдалануға беру тапсырылды.
Айта өтейік, Президент Қасым-Жомарт Тоқаев халықтың тұрмыс сапасын арттырудың негізгі тетігі ретінде қолжетімді баспана, сапалы білім беру және заманауи әлеуметтік инфрақұрылымды дамытуды тұрақты түрде назарда ұстап келеді. Осы бағытта Үкімет тұрғын үй құрылысын ұлғайтуға, білім беру нысандарын жаңғыртуға және әлеуметтік саланың қолжетімділігін арттыруға бағытталған ауқымды бағдарламаларды іске асыруда. Шымкентте жүзеге асырылып жатқан жобалар осы мемлекеттік саясаттың өңірлік деңгейдегі нақты көрінісі болып табылады. Мектептердің материалдық-техникалық базасын күшейту, қосымша оқу орындарын ашу және азаматтарды баспанамен қамтамасыз ету демографиялық өсімі жоғары мегаполис үшін стратегиялық маңызға ие. Мұндай кешенді жұмыстар тұрғындардың әлеуметтік әл-ауқатын жақсартып қана қоймай, адами капиталдың сапасын арттыруға, өңірдің экономикалық әлеуетін нығайтуға және жайлы қалалық ортаны қалыптастыруға мүмкіндік береді.
«ANYQ.KZ»-ақпарат.
