Шымкент қаласының әкімі Ғабит Сыздықбеков Еңбекші ауданының тұрғындарымен көшпелі кездесу өткізіп, жергілікті жердегі өзекті мәселелерді талқылады. Жиынға Ұлағат шағынауданы, Алдияров көшесі және Достық, Базарқақпа, Тоғыс тұрғын алаптарының тұрғындары қатысты.
Кездесуде азаматтар жолдарды кеңейту, балалар алаңшаларын салу, бейнебақылау камераларын, бағдаршамдар мен жасанды жол кедергілерін орнату, автобус бағыттарын ұзарту және аумақтарды абаттандыру мәселелерін көтерді. Тұрғындардың ұсыныстары ең алдымен күнделікті өмірге қажетті инфрақұрылымды жақсартуға бағытталды.
Коммуналдық инфрақұрылымға қатысты мәселелер де жеке талқыланды. Атап айтқанда, үйлерді кәріз желілеріне қосу, электр желілері мен трансформаторларды жөндеу, көпқабатты үйлерді жаңарту бағдарламасына қатысу мәселелері қаралды.
Әлеуметтік және спорттық нысандарға қатысты ұсыныстар да айтылды. Ұлағат шағынауданында балабақша мен емхана салу мүмкіндігін қарастыру ұсынылса, Тоғыс тұрғын алабында спорт кешенін салу қажеттігі жеткізілді. Бұл ұсыныстар аталған аумақтардағы әлеуметтік инфрақұрылымға сұраныстың бар екенін көрсетеді.
Көтерілген барлық мәселе бойынша тұрғындарға толық жауап беріліп, тиісті түсініктемелер айтылды. Қала әкімі азаматтардың белсенді қатысып, нақты ұсыныстар білдіргені үшін алғыс айтып, көтерілген мәселелерді жан-жақты зерделеп, шешу жолдарын қарастыруды тапсырды.
Көшпелі кездесу форматы мәселелерді тұрғындардың өз ортасында зерделеуге, аумақтағы ең өзекті түйткілдерді анықтауға және халықтың нақты қажеттіліктерін ескере отырып, тиімді шешімдер қабылдауға мүмкіндік береді. Тұрғындардың ұсыныстары алдағы жұмыстардың негізгі бағыттарын айқындауға негіз болмақ.
«ANYQ.KZ»-ақпарат.
