Түркістан қаласы әкімдігі аппаратының басшысы Қуаныш Әлібековтің төрағалығымен орындаушылық тәртіптің іске асырылу барысына арналған кезекті мәжіліс өтті.
Жиында қала әкімі Әзімбек Пазылбекұлының халықпен кездесулері барысында берілген тапсырмалар мен тұрғындар тарапынан көтерілген өтініштердің орындалу барысы қаралды. Сондай-ақ азаматтардың өтініштері мен шағымдарын заңнама талаптарына сәйкес уақтылы әрі сапалы қарау және орындаушылық тәртіпті күшейту мәселелеріне басымдық берілді.
Мәжілісте 23–25 маусым аралығында өткен халықпен кездесулер мен азаматтарды жеке қабылдау барысында көтерілген мәселелердің орындалуына талдау жасалды. Аталған кездесулерде тұрғындар тарапынан барлығы 180 мәселе көтерілген болатын.
Жиын барысында көтерілген мәселелердің орындалу барысы сараланып, заң талаптарына сәйкес түсіндірілген және орындалуы мүмкін емес мәселелер бойынша берілген жауаптар қаралды. Сонымен қатар, азаматтармен кері байланысты күшейтіп, өтініштердің мерзімінде әрі сапалы орындалуын қамтамасыз ету міндеті қойылды.
Айтпақшы, заң талаптары демекші, Түркістан қаласында жыл басынан бері заңсыз орналастырылған 422 жарнама нысаны анықталды. Оның ішінде 25 нысан заң талаптарына сәйкестендіріліп, салық төлеу үшін кірістер басқармасына жолданса, қалған 397 жарнама нысаны бөлшектеліп, жойылды.
Қала әкімдігі кәсіпкерлерді жарнама нысандарын орналастырмас бұрын белгіленген тәртіпке сәйкес Түркістан қаласының сәулет және қала құрылысы бөліміне хабарлама жолдауға шақырады. Бұл қаланың сәулеттік келбетін сақтауға және заң талаптарының орындалуын қамтамасыз етуге бағытталған.
Иә, Президент Қасым-Жомарт Тоқаев мемлекеттік басқару жүйесінің тиімділігі ең алдымен халықтың өтінішіне жедел әрекет етуімен және әкімдердің тұрғындар алдындағы нақты есептілігімен өлшенетінін үнемі айтып келеді. Мемлекет басшысы «Халық үніне құлақ асатын мемлекет» тұжырымдамасын жариялағаннан бері барлық деңгейдегі әкімдердің тұрғындармен тұрақты кездесуі, азаматтарды жеке қабылдауы және көтерілген мәселелердің орындалуын бақылауы мемлекеттік басқарудың міндетті стандартына айналды. Тоқаевтың айтуынша, «Әкімдердің басты міндеті – кабинетте отырып есеп жазу емес, халықтың мәселесін уақытылы шешу».
Соңғы жылдары бұл бағыттағы құқықтық және институционалдық тетіктер де күшейтілді. Қазақстанда Әкімшілік рәсімдік-процестік кодекс пен «Жеке және заңды тұлғалардың өтініштерін қарау» жөніндегі нормалар негізінде мемлекеттік органдардың азаматтардың өтініштеріне жауап беру сапасына қойылатын талаптар қатаңдатылды. Мемлекеттік органдардың жұмысы енді тек қаралған өтініштердің санымен емес, мәселенің нақты шешілу деңгейімен және азаматтардың қанағаттану көрсеткішімен бағаланады. Бұл мемлекеттік аппараттың есеп берушілігін күшейтіп, халықпен кері байланысты жаңа деңгейге шығаруға мүмкіндік берді.
Түркістан қаласында бір ғана халықпен кездесу кезеңінде 180 мәселенің көтеріліп, олардың орындалу барысының арнайы мәжілісте жеке қаралуы осы жаңа басқару мәдениетінің қалыптасып келе жатқанын көрсетеді. Мұндай тәсіл тұрғындардың өтініштерін тіркеумен ғана шектелмей, олардың орындалуын тұрақты бақылауға алып, жауапты мекемелердің нақты жауапкершілігін арттыруға мүмкіндік береді. Бұл – мемлекеттік қызмет сапасын арттырудың және халықтың жергілікті билікке деген сенімін нығайтудың маңызды тетігі.
Сонымен қатар қалада заңсыз жарнама нысандарын ретке келтіру бағытындағы жұмыстар да «Заң және тәртіп» қағидатының нақты көрінісі. Жыл басынан бері 422 заңсыз жарнама конструкциясының анықталып, 397-сінің бөлшектелуі қаланың сәулеттік келбетін сақтау мен заң талаптарының сақталуын қамтамасыз етуге бағытталған жүйелі жұмыстың нәтижесін аңғартады. Бұл тек сыртқы жарнаманы реттеу емес, қалалық кеңістікті заманауи урбанистикалық талаптарға сәйкестендіру, бизнестің жауапкершілігін арттыру және тарихи шаһардың эстетикалық келбетін қорғау міндетімен де сабақтас.
Бүгінде Түркістан қарқынды дамып келе жатқан туристік әрі әкімшілік орталық болғандықтан, мемлекеттік басқару сапасына қойылатын талап та жоғары. Әрбір өтініштің уақытылы орындалуы, қоғамдық кеңістіктің заң талаптарына сай болуы, кәсіпкерлердің ортақ ережелерді сақтауы және тұрғындармен тұрақты диалогтың жолға қойылуы қаланың инвестициялық тартымдылығына, туристік имиджіне және өмір сүру сапасына тікелей әсер етеді.
Сондықтан халықпен кездесулерде көтерілген мәселелердің жүйелі бақылауға алынуы мен орындаушылық тәртіптің күшейтілуі – жай ғана әкімшілік рәсім емес. Бұл Президент Қасым-Жомарт Тоқаев жүзеге асырып жатқан «Халық үніне құлақ асатын мемлекет», «Заң және тәртіп» және «Әділетті Қазақстан» қағидаттарының жергілікті деңгейде нақты іске асып жатқанын көрсететін маңызды көрсеткіш. Өйткені тұрғынның әрбір мәселесіне уақытылы ден қою, заң талаптарының бәріне бірдей қолданылуы және ашық әрі жауапты мемлекеттік басқару ғана халық сенімін нығайтып, Түркістанның тұрақты әрі сапалы дамуына берік негіз қалайды.
«ANYQ.KZ»-ақпарат.
