Білім беру сапасын жақсарту, кадрлар даярлау, аттестация жүйелері, IT-жобалар, төсбелгі: Астанада ТМД-ға мүше елдер өкілдері білім беру саласындағы ынтымақтастықты талқылады.
Білім саласындағы ынтымақтастық мәселелерін ТМД-ға мүше елдер өкілдері талқылады. ҚР Оқу-ағарту министрі Асхат Аймағамбетовтің төрағалығымен Білім беру саласындағы кеңес отырысы өтті. Оған Беларусь, Тәжікстан, Ресей Федерациясы, Қырғызстан, Армения елдерінің өкілдері қатысты.
Айтулы шараға Мақтаарал ауданының адами әлеуетті дамыту бөлімі әдістемелік кабинет меңгерушісі Исламова Ултуар Құдайбергенқызы да қатысты.
Күн тәртібінде отырысқа қатысушылар ТМД-ға мүше мемлекеттердің базалық ұйымдары қызметін дамыту, білім сапасын қамтамасыз ету, білікті мамандарды даярлау, ұлттық аттестация жүйелерін дамыту мәселелерін қарады. Сондай-ақ Кеңес мүшелері білім саласы қызметкерлерін «Тәуелсіз Мемлекеттер Достастығының білім беру ісінің үздігі» төсбелгісімен марапаттау туралы шешім қабылдады.
ТМД-ға мүше мемлекеттер мұғалімдері мен білім беру саласы қызметкерлерінің VII съезі өтті. ТМД елдерінің үздік педагогтерінің шеберлік сабақтары өтті. Сондай-ақ тәжірибе алмасу алаңдары ұйымдастырылды. Съезде ТМД елдеріндегі білім саласының даму болашағын, қандай өзгерістер мен жаңалықтар енгізіліп жатқанын талқылап, қарар қабылданды. Съезді тәжірибе алмасу алаңы ретінде қарастыру керек. Әріптестерімізбен білім саласындағы ынтымақтастықты одан әрі қалай дамытатынымызды талқылаймыз», — деді Оқу-ағарту министрі Асхат Аймағамбетов.
Педагогтер съезі ТМД елдері білім министрлері конференциясының шешімімен екі жылда бір рет өткізіледі. Съезд аясында ІІ Педагогикалық шеберлік фестивалінің қорытынды кезеңі өтіп, байқаудың финалистері, яғни ТМД елдерінің мұғалімдері елімізге келеді. Олар сайыс сабақтарын көрсетті. Мұғалімдерге арналған шеберлік сабақтары үш номинация бойынша өтті: мұғалім, тәрбиеші және психолог/әлеуметтік педагог.
«ҚР Оқу-ағарту министрлігі фестивальді осымен екінші рет қатарынан ұйымдастырып отыр. Сырттай өткен кезеңнің қорытындысы ұйымдастыру комитеті мен қазылар алқасының бірлескен отырысында белгілі болды. Фестивальдің дәстүрлі форматтағы кезеңі өтті. 50 үміткердің арасынан іріктеліп алынған үздік 35 мұғалімнің шеберлік сабақтары ұйымдастырылды. ТМД-ға мүше елдердің білім және ғылым министрліктерінің ұсыныстары негізінде ғылыми зерттеулер бағдарламаларының жобаларын әзірлеу, ТМД-ға мүше мемлекеттердің ғылыми және ғылыми-педагогикалық кадрларын аттестаттаудың ұлттық жүйелерін дамыту жөніндегі жұмыс тобы құрылды. Сондай-ақ ТМД-ға мүше елдердің ғылыми дәрежелері туралы құжаттарды өзара тану туралы келісім жасалды», — деді Ы.Алтынсарин атындағы Ұлттық білім академиясының президенті Мәдина Тыныбаева.
Съезде мектепке дейінгі және орта білім беру саласындағы цифрлық және баспа өнімдерінің көрмесі ұйымдастырылды. Қазақстандық кәсіпкерлер, стартаптар оқу үдерісін тиімді ұйымдастыруға бағытталған IT-жобаларын таныстырды.
Съезд Тәуелсіз Мемлекеттер Достастығына мүше мемлекеттердің гуманитарлық ынтымақтастығының мемлекетаралық қоры қолдауымен өтті.
