Ұстаз – ұлағатты есім, қастерлі ұғым, киелі тұлға. Ғаламның қыр-сырын ұғындыруда шәкірттерді білім нәрімен сусындатып, жан дүниесін рухани азықтандырушы ұстаздың қоғамда қашанда абыройы асқақ, беделі биік. Бүгін ұстаз қауымының кәсіби мерекесі қарсаңында аудандық мәдениет үйінде «Ұстаз жолы — Ұлы жол» тақырыбында мерекелік концерт болып өтті. Аталған іс-шараға аудан әкімі Сәкен Сұлтанханов арнайы қатысып, білім саласында еңбегімен еленген барша ұстаздар қауымын кәсіби мерекесімен құттықтады.
Аудан әкімі өз сөзінде: «Құрметті ұстаздар! «Ұстаз бақыты – озып туған шәкірті» десе, аттарыңызды ай-әлемге паш ететін талантты да білімді шәкірттеріңіз көбейе берсін. Қоғам мен адамзат алдындағы өлшеусіз еңбектеріңізді ескере отырып, сіздерге өскелең ұрпақ тәрбиелеудегі өрелі жұмыстар және мемлекеттің гүлденуі жолындағы абыройлы істеріңізге толымды табыс тілеймін. Қызығы мен шыжығы қатар жүретін ұстаздық жолдарыңыз тек өрлеу мен өсуге бастасын» – дей келе, Сәкен Асылханұлы еліміздің өсіп-өркендеуі білім саласындағы барша ұстаздардың қажырлы еңбегінің жемісі екенін атап өтті.
Сондай-ақ, аудандық білім және ғылым қызметкерлерінің кәсіподақ ұйымының төрағасы Егемберді Қасым құттықтау сөз сөйлеп, ізгі тілегін жеткізді.
Шара барысында аудан әкімі ардагер ұстаздарға да құрмет көрсетіп, ауданның білім беру саласында қызмет етіп жүрген бірқатар ұстазтарға алғыс хаттар табыстады.
Шара соңында «Отырар өнер және саз» мектебінің оркестр ұжымының ұсынған өнерін тамашалап, оқушылардың әуезді шырқалған әндері мен мың бұралған бишілер көтеріңкі көңіл-күй сыйлады.
Атап өтер жайт, 1994 жылдан бері дүние жүзінің 100-ден астам мемлекетінде қазан айының алғашқы жексенбісі мұғалімдер мен білім беру саласындағы қызметкерлердің кәсіби мерекесі болып белгіленген. Кей мемлекеттер бұл мерекені 5 қазан күні атап өтеді. Біздің мемлекетімізде де бұл мерекені қазан айының алғашқы жексенбісіне белгілеген. Дәлірек айтсақ, мұғалімдер күні 1965 жылы 29 қыркүйекте КСРО жоғарғы кеңесі президумының бұйрығымен қазан айының алғашқы жексенбісіне қойылған. Сондай-ақ 1966 жылы 5 қазанда ЮНЕСКО мен Халықаралық еңбек ұйымының өкілдері «Мұғалімдердің мәртебесіне қатысты ұсыныстар» құжатына қол қойған. Ұстаздар күні — көпшілік жақсы көретін кәсіби мерекелердің бірі. Бұл күні ұстаздар өздерінің шәкірттерінен тілектер мен гүлдер, сыйлықтар қабылдайды. Сондай-ақ, мектептерде концерттер ұйымдастырылып, түрлі-түсті қабырға газеттері әзірленеді.
«ANYQ.KZ»-ақпарат.
