Бүгін Республика күніне орай «Ұлы Дала Елі» орталығында «Тәуелсіздік – тұғырым» атты әдеби кеш өтті.
Шара барысында Түркістан қаласының мектеп оқушыларына жаугершілік заманда еліне қорған, халқына пана болған батырлардың бірі, тәуелсіздік жолында күрескен тарихи тұлға – Қаракерей Қабанбайдың өмірі мен қазақ халқының қамы үшін жасаған ерлік істері насихатталды.
– Біздер үшін қайталанбас тәлімдік тәрбие беретін, халқымыздың бай мұрасы болған бұл тарихи тұлғаларды ардақтаймыз, мақтан етеміз, бас иеміз! Тәуелсіздік – біздің бағымыз, қалай жырласақ та, шырқасақ та жарасады. Еліміздің шаңырағы биік, уығы берік, керегесі кең болғай! – дейді ұйымдастырушылар.
Республика күні биыл кеңінен аталып өтуде. Бұл мерекеге ұлттық сипат беруді Мемлекет басшысы Ұлытауда ұсынған еді. Қыркүйек айының соңында Президент Жарлыққа қол қойған болатын.
