Жаңа оқу жылында облыстағы орта білім беру ұйымдарының желісі 1060-қа жетті. Оның 910-ы — мемлекеттік, 148-і — жекеменшік. Оқушылардың болжамды саны 530 мың болса, оның ішінде 1-сыныпқа қабылданатын балалар саны 50 мыңнан асады деп жоспарланып отыр. Бұл туралы Түркістан облысы әкімдігі жанындағы кәмелетке толмағандардың ісі және олардың құқықтарын қорғау жөніндегі комиссияның кезекті отырысында баяндалды. Облыс әкімінің орынбасары Бейсенбай Тәжібаевтың төрағалығымен өткен жиында, сонымен қатар жаңа оқу жылы қарсаңындағы өзекті мәселелер қаралды.
– Мектеп формасын бірізді етуге баса мән керек. Діни атрибуттағы киім мәселесі, әсіресе, этнос өкілдері білім алатын жекеменшік мектептерде нашар. Теологтар тарапынан ата-аналарға түсіндірме жұмыстарын жүргізу үшін дін істері басқармасымен бірлесе жұмыс жүргізілу керек. Қазіргі таңда СЭС қорытындысы алынбай тұрған 103 мектеп бар. Оның жартысы күрделі және ағымдағы жөндеу жұмыстарының аяқталуымен шешіледі. Қалғанының жұмысын жылдамдатыңыздар. Өңірде жалпы 41 мектеп күрделі жөндеуді талап етеді. Биыл алғаш рет іске қосылатын білім ошақтарының қажетті құжат рәсіміне ерекше мән беріңіздер. Бюрократиялық кедергі жасамаңыздар. Жалпы, мектеп ашылса, бала оқу керек. Бала мектепке кірмесе, ашпаңыздар. Былтыр кей аудандарда ашып алып, оқушыларды біршама уақыт өткен соң кіргізген. Мұндай олқылықтардың алдын алу қажет. Ашылған мектеп ғимаратының маңында инфрақұрылымның да сай болғаны аса маңызды. Мерзімінде құжаттандыруды тапсырамын. Біразында жылу қазандықтары жаңадан орталыпы жатыр. Бірақ әлі де пайыздық көрсеткіші аз. Аудандар аранйы мониторинг жасап, газдандыруды қажет ететін мектептерді анықтап беріңіздер. Облысқа қарайды, ауданға қарайды деген болмайды. Барлығы — өңіріміз үшін, болашағымыз үшін жасалып жатқан қадамдар, – деді Бейсенбай Дәулетұлы.
Облыстық білім басқармасы басшысының орынбасары Айгүл Қасымбекова баяндама жасады. Оның айтуынша, аудандық, қалалық білім бөлімдері мен облыстық білім беру ұйымдарында жаңа 2024-2025 оқу жылына дайындық жұмыстары қарқынды жүргізілуде. Сондай-ақ 300-ден астам білім беру ұйымына жүргізіп жатқан жөндеу жұмыстарына талдау жасалды.
Комиссия мүшелері «Мектепке жол» акциясы аясында, әлеуметтік осал топ отбасынан шыққан балаларды мектеп формасымен қамтамасыз ету жайын саралады. Білім беру ұйымдарында балаларды ыстық тамақпен қамту және асханалардың санитариялық жағдайын талқылады. Педагогтардың білім жетілдіру мәселесін қозғады.
«Жайлы мектеп» білім беру саласындағы пилоттық ұлттық жобасы» аясында Түркістан облысында 2023-2025 жылдары жобалық қуаттылығы 49 мың орындық 63 мектеп құрылысын салу жоспарланған. Биыл 22 900 орындық 29 мектептің құрылысы аяқталып пайдалануға беріледі деп күтілуде. Оның 7-еуі толық құрамда жаңа жайлы мектепке көшіріледі. «Қалған 22 мектепке оқушылар әр мектептен жиналады, бұл мектептердің оқушылары баланстан балансқа ауыстыру тәртібімен оқулықпен толық қамтамасыз етілетін болады» — дейді мамандар. Ұлттық жобасы аясында жаңадан бой көтеріп жатқан мектептерді баламен қамту және қажетті оқулықтармен қамтамасыз ету барысы баяндалды. Бұдан бөлек 20 мектептің құрылысы жүргізіліп жатыр. Биыл 13-ін тапсыру жоспарланса, соның ішінде 4-еуі жаңа оқу жылы қарсаңында пайдалануға беріледі. Облыста жалпы 143 жеке мектеп бар. Биыл Түркістан қаласының өзінде оннан аса білім ошағы беріледі.
Тамыз айынан бастап, облыстағы 48 мектептің асханасына құрылыс жұмысын жүргізу және қажетті заттармен қамтамасыз ету үшін мемлекеттік жекешелік әріптестік жобасы арқылы шешіледі. Ал әлеуметтік осал топ отбасыларының балаларына көмектесу үшін мемлекеттік көмектен бөлек, қоғамдық ұйымдар белсенділік танытуда.
Орайы келгенде айта өтейік, Түркістан облысында биыл 50 мыңнан астам бала бірінші сыныпқа барады. Бұл туралы брифингте Түркістан облысы білім басқармасы басшысының міндетін атқарушы Жандос Маханбетов мәлімдеді.
Түркістан облысында 2024-2025 оқу жылында орта білім беру ұйымдарының саны 1 060-қа артқан. Бүгінде өңірде 530 мың оқушы болса, оның 52 593-ы биыл 1-сыныпқа қабылданады.
«Жалпы Түркістан облысында 121 мектеп күрделі жөңдеу жұмыстарын қажет етеді. Бүгінде 66 мектептің жобалық сметалық құжаты дайын. Биыл 22 мектептің күрделі жөндеу жұмыстары басталып, 5 мектеп 2024 жылдың 1 қыркүйегінде пайдалануға берілмек. Өңірде «Жайлы мектеп» білім беру саласындағы пилоттық ұлттық жобасы» аясында 2023-2025 жылдары аралығында 49 мың орындық 63 мектеп салу жоспарланған. Ал 2024 жылы 22 900 орындық 29 мектеп қолданысқа беріледі. Сонымен қатар, «Жайлы мектептердегі» педагогтардың біліктілігін арттыру бойынша «Абай атындағы Қазақ ұлттық педагогикалық университетімен» келісім-шарт жасалып, қазіргі таңда 41 мұғалім білімін жетілдіруде. Бұдан бөлек, жаңа оқу жылынан бастап облыстағы бастауыш сыныпта оқитын 187 832 бала бір реттік тегін ыстық тамақпен қамтамасыз етіледі»,- деді Жандос Маханбетов.
Спикердің сөзінше 2024 жылғы «Мектепке жол» акциясы аясында мемлекеттік білім беру ұйымдарында білім алатын әлеуметтік осал топ отбасынан шыққан 60 693 балаға мемлекеттік қолдау көрсетіледі. Әр баланың мектеп формасына 43 407 теңге берілген. Сондай-ақ, «AMANAT» партиясының Түркістан облысының филиалы әдеуметтік осал топ отбасыдан шыққан 16 балаға мектеп формасымен қоса оқу құралдарын алып берген. Одан бөлек, қоғамдық ұйым өкілі «Дәулеттен» ЖШС-і тарапынан жаңа оқу жылында 1-сыныпқа келетін 50 оқушыға көмек беруге ұсыныс білдіріп, тізімі жолданған.
«ANYQ.KZ»-ақпарат.
