Шымкент қаласында маса мен шіркейге қарсы залалсыздандыру жұмыстары жүргізілуде. Жоспарға сәйкес өңдеу шаралары саябақтарда, гүлзарларда, өзендер мен каналдардың жағалауларында, сондай-ақ тұрғындардың демалыс орындарында тұрақты түрде атқарылып келеді.
Осыған байланысты жауапты мамандар тұрғындарды қауіпсіздік талаптарын сақтауға шақырады. Атап айтқанда, залалсыздандыру жүргізілген аумақтарда балалардың ойнауына жол бермеу және өңделген жерлермен тұрмыстық заттардың жанаспауын қадағалау қажет.
Мамандардың айтуынша, зиянкестердің көбеюінің алдын алуда тұрғындардың да жауапкершілігі маңызды. Ол үшін аулаларды таза ұстап, су жиналатын орындардың пайда болуына жол бермеу қажет.
Сонымен қатар жеке тұрғын үйлер мен кәсіпкерлік нысандар аумағында жүргізілетін залалсыздандыру жұмыстары өтінім берушілердің жеке қаражаты есебінен жүзеге асырылады. Бұл жұмыстар қала аумағында санитарлық-эпидемиологиялық ахуалды жақсартуға және тұрғындардың жайлы демалысына қолайлы жағдай жасауға бағытталған.
Қоршаған ортаның тазалығы мен санитарлық қауіпсіздік – халық денсаулығын сақтаудың негізгі тетіктерінің бірі. Мемлекет басшысы Қасым-Жомарт Тоқаев экологиялық мәдениетті қалыптастырып, елді мекендердің тазалығын қамтамасыз етуге ерекше мән беріп келеді. Бүгінде елімізде «Таза Қазақстан» тұжырымдамасы аясында қоршаған ортаны қорғау бағытындағы жұмыстар жүйелі жалғасуда. Сарапшылардың пікірінше, зиянкестермен күрес шаралары инфекциялық аурулардың таралу қаупін төмендетіп, тұрғындардың өмір сүру сапасын арттыруға ықпал етеді. Осы тұрғыдан алғанда, Шымкентте жүргізіліп жатқан дезинсекциялық жұмыстар тек санитарлық ахуалды жақсартумен шектелмей, қолайлы қалалық экожүйені қалыптастыруға, тұрғындардың қауіпсіз әрі жайлы демалысын қамтамасыз етуге бағытталған маңызды бастама болып табылады.
«ANYQ.KZ»-ақпарат.
