Мемлекет басшысы Қасым-Жомарт Тоқаев өңірлердің экономикалық әлеуетін арттыруда ауыл шаруашылығы өнімдерін терең өңдеу, инвестиция тарту және жаңа өндірістерді дамыту мәселесіне ерекше назар аударып келеді. Бұл бағыт «2029 жылға дейінгі халықтың кірісін арттыру бағдарламасының» негізгі басымдықтарының бірі саналады. Бағдарламаның басты мақсаты – халықты тұрақты жұмыспен қамту, еңбек өнімділігін арттыру, шағын және орта кәсіпкерлікті дамыту, өндіріс көлемін ұлғайту және азаматтардың тұрақты табыс көздерін қалыптастыру.
Осы міндеттерді іске асыру бағытында Түркістан облысында жүйелі жұмыстар жүргізілуде. Облыс әкімі Нұралхан Көшеровтің тапсырмасына сәйкес, аудандарда инвестициялық белсенділікті күшейту, өндіріс орындарын ашу, ауыл шаруашылығы өнімдерін қайта өңдеу кәсіпорындарын көбейту және жаңа жұмыс орындарын құруға басымдық беріліп отыр. Бұл жұмыстардың нәтижесі өңірдің әлеуметтік-экономикалық дамуына ғана емес, халықтың әл-ауқатының артуына да тікелей ықпал етуде.
Солардың бірі – Отырар ауданы. Ауыл шаруашылығы аудан экономикасының негізгі саласы саналатын өңірде бүгінде шикізатты сатумен ғана шектелмей, оны терең өңдеу арқылы қосылған құны жоғары өнім өндіруге басымдық беріліп келеді. Бұл өз кезегінде еңбек нарығын кеңейтіп, тұрғындардың тұрақты жұмыспен қамтылуына және кәсіпкерліктің дамуына жаңа мүмкіндіктер ашуда.
Бүгінде Қарғалы ауылдық округінде орналасқан «Отырар» индустриалды аймағында арнайы өндірістік парк жұмысын бастап, аудан экономикасының жаңа даму нүктесіне айналып келеді. Өндірістік аймақта жалпы инвестициялық құны 305 миллион теңгені құрайтын 5 жоба жүзеге асырылуда. Соның нәтижесінде 21 жергілікті тұрғын тұрақты жұмыспен қамтылып, ауыл халқы үшін жаңа еңбек мүмкіндіктері қалыптасты.
Бұл көрсеткіштер тек инвестиция көлемін ғана білдірмейді. Әрбір жаңа кәсіпорын – жаңа жұмыс орны, жаңа мамандық, жаңа кәсіби тәжірибе және тұрақты табыс көзі. Мұндай өндірістердің іске қосылуы ауылдық жерлерде жастардың еңбекке орналасуына, тұрғындардың кәсіпкерлікке қызығушылығының артуына және ішкі көші-қонның азаюына оң ықпал етеді. Себебі туған жерде тұрақты жұмыс болған жағдайда халықтың әлеуметтік жағдайы жақсарып, экономикалық белсенділігі арта түседі.
Өндірістік парктің жұмысымен танысу мақсатында аудан әкімі Қайрат Жолдыбайұлы арнайы барып, кәсіпкерлермен кездесті. Кездесу барысында өндіріс орындарының қазіргі ахуалы, алдағы даму жоспарлары және мемлекеттік қолдау тетіктері талқыланды. Аудан басшысы жауапты бөлімдерге кәсіпкерлерге инфрақұрылымдық және құқықтық қолдау көрсетуді жалғастыру, өндіріс көлемін ұлғайтуға жағдай жасау және инвестициялық жобалардың уақытылы жүзеге асырылуын тұрақты бақылауда ұстау жөнінде нақты тапсырмалар берді.
Өндірістік парктегі ең ірі жобалардың бірі – «Eliko Snacks» жауапкершілігі шектеулі серіктестігінің сублимациялық кептірілген жеміс өндіру кәсіпорны. Бұл жоба аудандағы ауыл шаруашылығы өнімдерін қайта өңдеу саласына енгізілген заманауи технологиялардың жарқын үлгісі болып отыр.
Сублимациялық кептіру технологиясы өнім құрамындағы дәрумендер мен табиғи дәмдік қасиеттердің шамамен 95 пайызын сақтай отырып, ылғалды вакуумдық әдіспен жоюға мүмкіндік береді. Нәтижесінде өнімнің сақтау мерзімі ұзарып, сапасы төмендемейді, ал тасымалдау жеңілдейді. Мұндай технология халықаралық нарық талаптарына сай өнім шығаруға жол ашады.
Ең бастысы, кәсіпорын жергілікті шаруалардың өндірген жеміс-жидегін сатып алып, оны жоғары қосылған құны бар дайын өнімге айналдырады. Бұрын шикізат күйінде сатылатын өнім енді ауданның өзінде өңделіп, нарыққа дайын тауар ретінде ұсынылады. Бұл ауыл шаруашылығы тауарын өндірушілердің табысын арттырумен қатар, өңірдің экспорттық әлеуетін күшейтуге мүмкіндік береді.
Қазіргі таңда кәсіпорында 5 адам тұрақты жұмыспен қамтылған. Ал өндірістік қуаты толық іске қосылған кезде тәулігіне 100 килограмға дейін өнім өңдеу жоспарланып отыр. Болашақта өндіріс көлемінің артуына қарай қосымша жұмыс орындарын ашу мүмкіндігі де қарастырылуда.
Мұндай жобалардың тағы бір маңызды ерекшелігі – еңбек нарығында сұранысқа ие жаңа мамандықтардың қалыптасуына ықпал етуі. Заманауи өндіріс технологияларын меңгерген технологтар, инженерлер, операторлар, зертхана мамандары мен логистика қызметкерлеріне қажеттілік артады. Бұл техникалық және кәсіптік білім беру ұйымдары үшін де жаңа міндеттер жүктеп, кадрларды еңбек нарығының сұранысына сәйкес даярлаудың маңызын күшейтеді.
Сонымен қатар мұндай өндірістер шағын және орта кәсіпкерліктің дамуына да серпін береді. Өнімді тасымалдау, қаптау, сақтау, сервистік қызмет көрсету сияқты қосымша бағыттарда да жаңа бизнес мүмкіндіктері пайда болады. Нәтижесінде бір өндіріс орнының ашылуы бірнеше қосалқы кәсіптің дамуына негіз қалайды.
Ауыл шаруашылығы өнімдерін қайта өңдеу кәсіпорындарының көбеюі азық-түлік қауіпсіздігін қамтамасыз етуге, импортқа тәуелділікті азайтуға және отандық өнімнің бәсекеге қабілеттілігін арттыруға да ықпал етеді. Бұл – мемлекеттің өндірісті әртараптандыру және өңдеу өнеркәсібінің үлесін арттыру жөніндегі стратегиялық міндеттерімен толық үндеседі.
Аудан әкімі Қайрат Жолдыбайұлы өндірістік паркке жасаған жұмыс сапары барысында мұндай жобалардың өңір экономикасы үшін маңызы ерекше екенін атап өтті. Оның айтуынша, кәсіпкерлерді қолдау, инвестиция тарту және өндіріс орындарын көбейту бағытындағы жұмыстар алдағы уақытта да жалғасады.
Бүгінде Отырар ауданында жүзеге асырылып жатқан инвестициялық жобалар мемлекеттік қолдау шараларының нақты нәтижесін көрсетіп отыр. Жаңа өндіріс орындарының ашылуы халықты тұрақты жұмыспен қамтуға, еңбек өнімділігін арттыруға, ауыл тұрғындарының табысын көбейтуге және кәсіпкерлікті дамытуға мүмкіндік береді. Сондықтан ауыл шаруашылығы өнімдерін терең өңдеуге негізделген мұндай бастамалар «2029 жылға дейінгі халықтың кірісін арттыру бағдарламасының» мақсаттарына толық сай келіп, ауданның тұрақты әлеуметтік-экономикалық дамуына жаңа серпін беретін маңызды жобалардың бірі болып қала береді.
«ANYQ.KZ»-ақпарат.
