Шымкент қаласында масаға қарсы залалсыздандыру жұмысы жүруде. Жоспарға сәйкес тиісті жұмыс саябақтар мен гүлзарлар, өзен-каналдардың жағалауы сияқты демалыс орындарында тұрақты жүргізіліп келеді.
Осыған орай жауапты мамандар жергілікті тұрғындардан сақтық шараларын ұстануды сұрайды. Залалсыздандыру жүргізілген аймақтарда балалардың ойнамауын және өңделген жерлермен тұрмыстық заттардың жанаспауын қадағалау қажет.
Сонымен қатар, тұрғындар да өз аулаларын таза ұстап, судың жиналуына жол бермеу арқылы зиянкестер көбеюінің алдын ала алады.Бұл орайда жеке үйлер мен кәсіпкерлік аумақтардағы залалсыздандыру өтінім берушілердің жеке қаржысы есебінен жүргізіледі.
Биыл Шымкентте масаға қарсы дезинсекциялық іс-шаралар бірнеше кезең бойынша жүзеге асырылып, қала аумағындағы саябақтар, гүлзарлар, өзендер мен каналдардың жағалаулары, сондай-ақ тұрғындар көп жиналатын демалыс орындары жоспарлы түрде өңделуде. Мамандар өңдеу жұмыстарының кестеге сәйкес таңғы және кешкі уақытта жүргізілетінін, қолданылатын препараттардың санитариялық талаптарға сай екенін атап өтеді. Бұл жұмыстардың басты мақсаты – масалардың жаппай көбеюіне жол бермеу, қолайлы санитариялық-эпидемиологиялық ахуалды сақтау және тұрғындардың жайлы демалысын қамтамасыз ету.
Мемлекет басшысы қоршаған ортаның тазалығы мен экологиялық мәдениетті қалыптастыру мәселесіне ерекше мән беріп келеді. Соған сәйкес республика көлемінде елді мекендердің санитариялық жағдайын жақсарту, зиянкестерге қарсы профилактикалық жұмыстарды жүйелі жүргізу және халықтың денсаулығын қорғау бағытындағы шаралар тұрақты бақылауда. Әсіресе халқы миллионнан асқан Шымкент сияқты ірі мегаполистерде мұндай жұмыстардың маңызы зор.
Мамандардың айтуынша, дезинсекциялық жұмыстардың нәтижелі болуы тек арнайы қызметтердің жұмысына ғана емес, тұрғындардың жауапкершілігіне де байланысты. Аула аумақтарын таза ұстау, су жиналатын орындарды дер кезінде жою, қоқысты бей-берекет тастамау және санитариялық талаптарды сақтау масалардың көбеюінің алдын алудың ең тиімді жолдарының бірі. Сондықтан қаладағы қолайлы экожүйені қалыптастыру мен қоғамдық денсаулықты қорғау ісіне әрбір тұрғынның үлесі маңызды.
«ANYQ.KZ»-ақпарат.
