Шымкентте тұрғындарды қолжетімді баспанамен қамтамасыз ету және әлеуметтік қолдауды қажет ететін азаматтардың тұрғын үй жағдайын жақсарту бағытындағы жұмыстар жалғасуда. Кезекті іс-шара аясында сатып алу құқығымен жалға берілетін пәтерлер 30 отбасының игілігіне берілді. Жаңа баспаналардың кілтін табыстау рәсіміне қала әкімі Ғабит Сыздықбеков қатысты.
Пәтерлер Асар-2 шағынауданындағы көпқабатты тұрғын үйлерден ұсынылды. Тұрғын үй бағдарламасы аясында баспанаға ие болғандардың қатарында мүгедектігі бар азаматтар, ерекше қажеттіліктері бар балаларды тәрбиелеп отырған отбасылар және толық емес отбасылар бар. Бұл санаттағы тұрғындар үшін жеке баспанаға қол жеткізу әлеуметтік тұрақтылықты қамтамасыз етіп, тұрмыс сапасын жақсартуға мүмкіндік береді.
Жаңа үйлер қолданыстағы құрылыс нормалары мен талаптарына сәйкес салынған. Тұрғындардың жайлы өмір сүруіне қажетті инженерлік-коммуникациялық инфрақұрылыммен қамтамасыз етіліп, пайдалануға дайын күйде ұсынылды. Мұндай тұрғын үйлердің берілуі баспана кезегінде тұрған азаматтардың мәселесін кезең-кезеңімен шешуге бағытталған жұмыстың маңызды бөлігі саналады.
Пәтер кілттерін алған отбасылар үшін бұл күн көптен күткен қуанышты сәтке айналды. Әсіресе, әлеуметтік қолдауды қажет ететін азаматтар үшін жеке шаңырақтың болуы отбасы әл-ауқатын арттырып, балалардың тұрақты әрі қолайлы ортада тәрбиеленуіне жағдай жасайды.
Айта кетейік, сатып алу құқығымен жалға берілетін тұрғын үй тетігі азаматтарға баспананы бірден толық сатып алмай-ақ, белгілі бір мерзім ішінде жалдау арқылы кейіннен жеке меншікке рәсімдеу мүмкіндігін береді. Бұл тұрғын үйге мұқтаж отбасылардың қаржылық мүмкіндіктеріне қарай баспана мәселесін шешуіне жол ашады.
Қалада тұрғын үй саясатын іске асыру, жаңа баспаналар ұсыну және тұрғындардың өмір сүру сапасын жақсарту бағытындағы жұмыстар алдағы уақытта да жалғасын табады.
“ANYQ.KZ”-ақпарат.
