Кентау қаласына қарасты тарихи Қарнақ ауылы – Түркістан өңіріндегі мәдени-танымдық бағыттағы маңызды орындардың бірі. Соңғы жылдары ауылдың инфрақұрылымын жақсарту, тұрғындар мен келушілер үшін қолайлы әрі қауіпсіз орта қалыптастыру бағытында бірқатар жұмыстар атқарылуда. Осы мақсаттағы маңызды қадамдардың бірі – «Ауыл құтқарушылары» бағдарламасы аясында жаңа өрт сөндіру бекетінің пайдалануға берілуі болды. Бұл – ауыл тұрғындарының қауіпсіздігін күшейтіп қана қоймай, өңірдің әлеуметтік инфрақұрылымын жетілдіруге және туристік әлеуетін арттыруға ықпал ететін маңызды нысан.
Салтанатты ашылу рәсіміне Түркістан облысы әкімінің бірінші орынбасары Зұлпыхар Жолдасов пен облыстық Төтенше жағдайлар департаментінің бастығы Бағдат Чайзада, Кентау қаласының әкімі Жандос Тасов, азаматтық қорғау саласының ардагерлері, қызметкерлері және ауыл тұрғындары қатысты.
Жиында сөз сөйлеген облыс әкімінің бірінші орынбасары ауылдық елді мекендердің қауіпсіздігін қамтамасыз ету мемлекеттік саясаттың маңызды бағыттарының бірі екенін атап өтті. Оның айтуынша, шалғай ауылдардағы құтқару қызметінің әлеуетін күшейту – тұрғындардың өмірі мен мүлкін қорғаумен қатар, өңірдің тұрақты дамуына негіз қалайды.
Қарнақ – ғасырлар бойы тарихи және мәдени мұрасымен ерекшеленіп келе жатқан елді мекендердің бірі. Мұнда келетін туристер мен зияратшылар саны жыл сайын артып келеді. Сондықтан қауіпсіздік инфрақұрылымының дамуы ауылдың туристік тартымдылығын арттырудағы маңызды факторлардың бірі саналады. Туризмді дамыту тек тарихи ескерткіштерді жаңғыртумен немесе жаңа бағыттар ашумен шектелмейді. Ол ең алдымен келушілер мен жергілікті тұрғындардың қауіпсіздігін қамтамасыз ететін заманауи инфрақұрылымның қалыптасуына тікелей байланысты.
Жаңа өрт сөндіру бекеті осы талаптарға толық жауап береді. Ғимарат заманауи стандарттарға сәйкес салынып, арнайы техникамен және қажетті құрал-жабдықтармен қамтамасыз етілген. Мұнда жеке құрамның тәулік бойы қызмет атқаруына барлық жағдай жасалған. Сонымен қатар өрт сөндіру автокөліктерін орналастыруға арналған арнайы бокстар мен техникалық қызмет көрсету алаңдары қарастырылған.
Салтанатты рәсім барысында бекеттің материалдық-техникалық әлеуетін арттыру мақсатында екі арнайы өрт сөндіру техникасының кілті табысталды. Бұл ауыл аумағында орын алуы мүмкін өрт пен басқа да төтенше жағдайларға жедел әрекет етуге мүмкіндік береді.
Іс-шара барысында азаматтық қорғау саласының дамуына үлес қосқан қызметкерлер мен жобаны жүзеге асыруға атсалысқан азаматтар марапатталды. Бұл олардың қоғам қауіпсіздігін қамтамасыз ету жолындағы еңбегіне көрсетілген құрметтің белгісі болды.
Бүгінде елді мекендердің қауіпсіздігін күшейту – тұрғындардың өмір сүру сапасын арттырудың маңызды көрсеткіштерінің бірі. Ал тарихи Қарнақ ауылында жаңа өрт сөндіру бекетінің ашылуы тұрғындардың алаңсыз өмір сүруіне жағдай жасап қана қоймай, ішкі туризмді дамытуға қажетті қауіпсіз әрі сенімді ортаны қалыптастыруға да өз үлесін қосады. Қауіпсіздік деңгейі жоғары өңір ғана туристер үшін тартымды бағытқа айналып, тарихи-мәдени мұраны кеңінен насихаттауға мүмкіндік береді.
«ANYQ.KZ»-ақпарат.
