Қазіргі таңда еңбек қауіпсіздігін қамтамасыз ету тек өндірістегі техника қауіпсіздігін сақтаумен ғана шектелмейді. Қызметкерлердің денсаулығын нығайту, салауатты өмір салтын қалыптастыру, ұжымдық бірлікті күшейту және еңбек өнімділігін арттыру да осы ұғымның ажырамас бөлігіне айналды. Сондықтан мемлекеттік мекемелерде қызметкерлердің дене белсенділігін арттыруға, бұқаралық спортты дамытуға және корпоративтік мәдениетті нығайтуға бағытталған іс-шараларға ерекше көңіл бөлінуде.
Президент Қасым-Жомарт Тоқаев бұқаралық спортты дамыту, ұлт саулығын нығайту және еңбекке қабілетті азаматтардың денсаулығын сақтау мәселесін мемлекеттік саясаттың маңызды бағыттарының бірі ретінде атап келеді. Себебі дені сау, кәсіби даярлығы жоғары әрі ұйымшыл ұжым ғана халыққа сапалы қызмет көрсетіп, мемлекеттік бағдарламалардың тиімді орындалуына үлес қоса алады.
Бұл бағыттағы жұмыстар Отырар ауданында да жүйелі түрде жүзеге асырылуда. Әсіресе, мемлекеттік қызметшілер мен құқық қорғау органдары қызметкерлері арасында спорттық жарыстар ұйымдастыру арқылы салауатты өмір салтын дәріптеу, қызметкерлердің кәсіби төзімділігін арттыру және еңбек ұжымдарындағы ынтымақтастықты нығайтуға басымдық берілуде.
Осы мақсатта 23 маусым – Қазақстан Республикасы Полициясы күніне және Қазақстан полициясының құрылғанына 34 жыл толуына орай Отырар аудандық полиция бөлімінің ұйымдастыруымен мекеме қызметкерлері арасында кіші футболдан аудандық турнир өтті.
Спорттық іс-шараның негізгі мақсаты – салауатты өмір салтын насихаттау, дене шынықтыру мен бұқаралық спортты дамыту, сондай-ақ түрлі мемлекеттік мекемелер арасындағы өзара ынтымақтастықты арттыру болды. Мұндай жарыстар қызметкерлердің физикалық дайындығын жетілдіріп қана қоймай, ұжымдағы өзара сенім мен жауапкершілік мәдениетін қалыптастыруға да ықпал етеді.
Турнирге аудандық полиция бөлімінен бөлек аудандық төтенше жағдайлар бөлімі, аудандық орталық аурухана, «Отырар спорт клубы», мәдениет, тілдерді дамыту, дене шынықтыру және спорт бөлімі, ішкі саясат бөлімі, білім бөлімі және тұрғын үй-коммуналдық шаруашылық бөлімінің қызметкерлерінен құралған командалар қатысты.
Жарыс барысында командалар жоғары дайындық деңгейін көрсетіп, тартысты ойын өрнегін паш етті. Әрбір кездесу қатысушылардың тек спорттық шеберлігін ғана емес, ұйымшылдығын, тәртіпке бағынуын және ортақ мақсатқа жұмыла әрекет ету қабілетін де айқын көрсетті. Бұл қасиеттер күнделікті қызмет барысында да ерекше маңызға ие.
Турнир қорытындысында бірінші орынды аудандық білім бөлімі жеңіп алса, екінші орын аудандық полиция бөліміне, үшінші орын аудандық төтенше жағдайлар бөліміне бұйырды.
Жеңімпаздарды марапаттау рәсіміне аудан әкімінің орынбасары Айдос Құлмаханов қатысып, қатысушыларды құттықтады. Ол өз сөзінде мұндай жарыстардың қызметкерлер арасында салауатты өмір салтын қалыптастырумен қатар, еңбек ұжымдарының ұйымшылдығын арттыруға және мемлекеттік қызмет сапасын жақсартуға қосатын үлесінің зор екенін атап өтті. Сондай-ақ полиция қызметкерлерін кәсіби мерекелерімен құттықтап, аудан тұрғындарының қауіпсіздігін қамтамасыз ету жолындағы еңбектеріне алғысын білдірді.
Жеңімпаз және жүлдегер командалар арнайы кубоктармен, дипломдармен, сертификаттармен және бағалы сыйлықтармен марапатталды.
Еңбек ұжымдарында бұқаралық спортты дамыту – еңбек мәдениетін қалыптастырудың маңызды бөлігі. Үнемі спортпен айналысатын қызметкерлердің денсаулығы мықты болып, жұмысқа қабілеттілігі артады, күйзеліс деңгейі төмендейді және еңбек өнімділігі жоғарылайды. Бұл өз кезегінде мемлекеттік қызмет көрсету сапасына да оң әсер етеді.
Сондай-ақ мұндай жарыстар жастар арасында мемлекеттік қызмет пен құқық қорғау органдарының беделін арттыруға, тәртіпке, жауапкершілікке және еңбексүйгіштікке баулуға ықпал етеді. Қоғамға адал қызмет ететін мамандардың кәсіби даярлығы мен денсаулығын нығайту – мемлекеттік басқарудың тиімділігін арттырудың маңызды алғышарттарының бірі.
Отырар ауданында ұйымдастырылған Полиция күніне арналған футбол турнирі спорттық сайыс қана емес, мемлекеттік қызметкерлер арасында салауатты өмір салтын дәріптеуге, еңбек қауіпсіздігі мәдениетін нығайтуға, ұжымдық ынтымақтастықты дамытуға және халыққа сапалы қызмет көрсететін кәсіби кадрлардың әлеуетін арттыруға бағытталған маңызды қоғамдық бастама ретінде ерекшеленді.
«ANYQ.KZ»-ақпарат.
