23 маусым – Мемлекеттік қызметшілер күніне орай Түркістан қаласында мемлекеттік мекеме қызметкерлері арасында Түркістан қаласы әкімінің кубогі үшін кіші футбол және арқан тарту жарысы өтті. Іс-шара Түркістан қаласындағы Ш.Ниязов көшесінде орналасқан «Жаңа жабық алаңда» ұйымдастырылды.
Спорттық додаға қаладағы мемлекеттік мекемелерден 120-ға жуық қызметкер қатысып, өзара бақ сынасты. Жарыстың басты мақсаты – мемлекеттік қызметшілер арасында салауатты өмір салтын насихаттау, бұқаралық спортты дамыту және ұжымдық ынтымақтастықты нығайту.
Жарыстың ашылу салтанатында Түркістан қаласы әкімінің орынбасары Мадияр Әліпов қатысып, қатысушыларға сәттілік тілеп, мерекемен құттықтады.
Тартысты өткен жарыс барысында қатысушылар жоғары дайындық пен ұйымшылдықтың үлгісін көрсетті. Жарыс қорытындысы бойынша жеңімпаз және жүлдегер командалар арнайы дипломдармен, медальдармен және кубоктармен марапатталды. Мемлекеттік қызметшілер күніне арналған спорттық шара мерекелік көңіл-күй сыйлап, қатысушылар арасындағы достық қарым-қатынасты одан әрі нығайта түсті.
Айта өтейік, мемлекеттік қызмет – тек кәсіби міндеттерді орындаумен шектелмейтін, жоғары жауапкершілік пен қоғамдық сенімге негізделген маңызды сала. Сондықтан мемлекеттік қызметшілер арасында салауатты өмір салтын насихаттау, корпоративтік мәдениетті нығайту және командалық рухты қалыптастыруға бағытталған іс-шаралардың маңызы артып келеді. Қазақстанда Мемлекеттік қызметшілер күні жыл сайын түрлі танымдық, мәдени және спорттық шаралармен аталып өтіп, мемлекеттік аппараттың бірлігі мен кәсіби әлеуетін арттыруға ықпал етеді. Мемлекет басшысы Қасым-Жомарт Тоқаев мемлекеттік қызметшілердің кәсібилігімен қатар, адалдығы, жауапкершілігі және қоғамға қызмет ету мәдениеті жоғары болуы тиіс екенін үнемі айтып келеді. Осы тұрғыдан алғанда, Түркістанда ұйымдастырылған қала әкімінің кубогіне арналған спорттық жарыс мемлекеттік қызметкерлер арасындағы ынтымақтастықты нығайтып қана қоймай, салауатты өмір салтын дәріптеу арқылы тиімді әрі біртұтас мемлекеттік қызмет жүйесін қалыптастыруға өз үлесін қосады.
«ANYQ.KZ»-ақпарат.
