Түркістанның «Тұран» футбол клубы Бірінші лиганың 10-туры аясында өз алаңында «Ақтөбе Жас» командасын қабылдап, жанкүйерлеріне тартысты әрі нәтижелі ойын сыйлады.
Кездесу барысында түркістандық футболшылар жоғары деңгейдегі ойын өрнегін көрсетіп, қарсылас қақпасына жауапсыз төрт гол соқты. Нәтижесінде «Тұран» командасы «Ақтөбе Жасты» 4:0 есебімен ірі жеңіліске ұшыратты.
Матч бойы алаң иелері ойын тізгінін өз қолында ұстап, шабуылдағы белсенді әрекеттері мен қорғаныстағы сенімді ойындарының арқасында басымдық танытты. Жергілікті жанкүйерлердің қолдауына ие болған түркістандық ұжым кездесудің әр сәтінде жеңіске деген жігерін көрсетті.
Осы жеңістің нәтижесінде «Тұран» турнирлік кестедегі үшінші орнын нығайтып, көшбасшылар қатарындағы позициясын сақтап қалды. Команда алдағы турларда да жоғары нәтиже көрсетуге және жанкүйерлер сенімін ақтауға ниетті.
Айта кетейік, «Тұран» футбол клубы биылғы маусымда тұрақты ойын өрнегімен ерекшеленіп, Бірінші лиганың үздік командаларының бірі ретінде танылуда.
Түркістан шаһарында ескек есуден жазғы Қазақстан чемпионаты өтіп жатыр
Айтпақшы, Түркістан қаласындағы халықаралық есу арнасында байдарка мен каноэде ескек есуден ересектер арасындағы Қазақстан чемпионаты басталды. Бұл күзде Жапонияда өтетін жазғы Азия ойындарына қорытынды іріктеу жарыс саналады.
Салтанатты ашылу рәсіміне ҚР Туризм және спорт министрлігі Спорт және дене шынықтыру істері комитеті төрағасының орынбасары Аманбай Нұрмұханбетов, Түркістан облысы дене шынықтыру және спорт басқармасының басшысы Ғалымжан Худяров қатысып, сөз сөйледі.
Осы жарысқа 11 өңірден 130-ға жуық ескек есу шебері қатысып жатыр. Бүгін жарыстың алғашқы күні 1000 метрге жарыстар өтті.
«Нагоя қаласы қабылдайтын сары құрлық ойындарында байдарка мен каноэде ескек есуден 12 жүлде жиынтығы сарапқа салынады. Алайда әр команда тек 10 дисциплинада ғана спортшы қоса алады. Сонымен қатар Жапонияда тек 1000 метрге жарыс өтпейді. Тек қысқа қашықтықтарда жүлде сарапқа салынады. Сол себепті чемпионаттың алдағы күндері өте тартысты өтейін деп тұр», — деп атап өтті Ұлттық құраманың бас бапкері Қайсар Нұрмағамбетов.
Түркістандағы жазғы Қазақстан чемпионаты 21 маусымда мәресіне жетеді.
Жарыс демекші, Түркістан қаласындағы «Жібек Жолы» саябағында «Заң мен тәртіп» қағидаты аясында ұйымдастырылған «Тәртіпке тартыл» атты «TUR WORKAUT» облыстық турнирінің Түркістан қалалық іріктеу кезеңі де жоғары деңгейде өткенін атап өткен жөн.
Турнирдің ашылу салтанатына Түркістан қаласы әкімінің орынбасары Мадияр Әліпов және Түркістан облысы бойынша Экономикалық тергеп-тексеру департаментінің бөлім басшысы Абай Бауыржанұлы қатысып, құттықтау сөз сөйледі. Олар жарысқа қатысушы жастарды заңды құрметтеуге, қоғамдық тәртіпті сақтауға, салауатты өмір салтын ұстанып, спортпен белсенді айналысуға шақырды.
Спорттық шараға 200-ге жуық жас спортшы қатысып, күш пен ептілікті, шыдамдылық пен шеберлікті талап ететін жаттығулар бойынша бақ сынасты. Қатысушылар жоғары дайындық деңгейін көрсетіп, тартысты бәсекеде өзара мықтыны анықтады.
Жарыс қорытындысы бойынша үздік нәтиже көрсеткен спортшылар облыстық кезеңге жолдама алды. Атап айтқанда, 14–20 жас санатында — Элдар Манапов, 21–28 жас санатында — Тұрарбек Бексұлтан, Нұрсұлтан Рысқұлов және Оспан Болат, ал 29–35 жас санатында Орынтай Нұрболат пен Нұрсұлтан Жұмаділә өңірлік жарыста Түркістан қаласының намысын қорғайтын болады.
Ұйымдастырушылардың айтуынша, мұндай спорттық жобалар жастардың бос уақытын тиімді ұйымдастыруға, тәртіп пен жауапкершілік құндылықтарын дәріптеуге оң әсер етеді. Осыған байланысты аталған жарысты алдағы уақытта тұрақты түрде өткізу жоспарланып отыр.
Қорыта айтсақ, Түркістан бүгінде тек рухани-мәдени орталық қана емес, еліміздің маңызды спорттық алаңдарының біріне де айналып келеді. Соңғы жылдары өңірде халықаралық талаптарға сай спорт инфрақұрылымы қалыптасып, республикалық және халықаралық деңгейдегі жарыстарды қабылдау мүмкіндігі едәуір артты. Футболдан бастап ескек есу, ұлттық спорт түрлері мен бұқаралық спортқа дейінгі бағыттардың қатар дамуы – осы жүйелі жұмыстың нәтижесі. Мемлекет басшысы Қасым-Жомарт Тоқаев бұқаралық және кәсіби спортты қатар дамыту, өңірлерде заманауи спорт нысандарын көбейту, жастарды салауатты өмір салтына баулу мемлекеттің басым міндеттерінің бірі екенін үнемі айтып келеді. Осы тұрғыдан алғанда, «Тұран» клубының сәтті өнер көрсетуі, Түркістанның ел чемпионаттарын қабылдауы және жастар арасында жаңа спорттық жобалардың көбеюі өңірдің спорттық әлеуетінің артып келе жатқанын көрсетеді. Бұл – тек жарыстардағы жеңістердің ғана емес, дені сау ұрпақ тәрбиелеуге, дарынды спортшыларды тәрбиелеуге және Түркістанды республиканың жетекші спорт орталықтарының біріне айналдыруға бағытталған жүйелі саясаттың нәтижесі.
«ANYQ.KZ»-ақпарат.
