Кентауда жастарды спорт пен мәдени іс-шараларға тарту арқылы нашақорлықтың алдын алу мәселесі қаралды

Loading

Кентау қаласында жастар арасында салауатты өмір салтын қалыптастыру, нашақорлықтың алдын алу және есірткі бизнесіне қарсы күресті күшейту мәселелері ведомствоаралық штаб отырысында талқыланды. Жиынды қала әкімінің орынбасары Бауыржан Әбенұлы жүргізді.

Басқосуда жас ұрпақты зиянды әдеттерден қорғау, олардың бос уақытын тиімді ұйымдастыру және қоғамдық ортада қауіпсіздікті қамтамасыз ету бағытында атқарылып жатқан жұмыстардың барысы қаралды. Әсіресе, жастарды спортқа, шығармашылыққа және мәдени-көпшілік іс-шараларға кеңінен тартудың маңыздылығына назар аударылды. Өйткені дене шынықтырумен тұрақты айналысу, өнер мен мәдениетке қызығушылық таныту жасөспірімдердің өмірлік ұстанымын қалыптастырып, бос уақытын мазмұнды өткізуіне ықпал етеді.

Отырыс барысында қалалық полиция бөлімінің криминалдық полиция бөлімшесінің жедел уәкілі, полиция аға лейтенанты Е. Алғабай нашақорлық пен есірткі бизнесінің алдын алу бағытында атқарылған жұмыстар және жүргізілген профилактикалық іс-шаралар туралы баяндады. Сонымен қатар Хантағы ауылының әкімі Ж. Қожахмет 2026 жылы осы бағытта жүзеге асырылған жұмыстарға тоқталып, алдағы кезеңге жоспарланған іс-шараларды таныстырды. Ал қалалық ішкі саясат бөлімінің басшысы Ж. Жақаев Кентау қаласы аумағында нашақорлық пен есірткі бизнесіне қарсы бағытталған профилактикалық жұмыстардың барысын баяндады.

Жиында жастар арасындағы құқықбұзушылық пен зиянды әдеттердің алдын алуда тек түсіндіру шараларымен шектелмей, олардың қызығушылығы мен қабілетін дамытуға жағдай жасау қажеттігі айтылды. Осы орайда спорттық жарыстарды, бұқаралық дене шынықтыру шараларын, мәдени-көпшілік кездесулер мен шығармашылық бағыттағы іс-шараларды көбейту жөнінде ұсыныстар енгізілді. Мұндай бастамалар жасөспірімдердің бос уақытын тиімді өткізуіне, ортақ қызығушылық төңірегінде бірігуіне және қоғам өміріне белсенді араласуына мүмкіндік береді.

Сондай-ақ білім беру мекемелерінде жауапты мамандардың қатысуымен профилактикалық кездесулерді жүйелі өткізу, жастарға нашақорлықтың зардаптарын түсіндіру және салауатты өмір салтын насихаттау жұмыстарына ерекше мән беру қажеттігі атап өтілді. Спорт пен мәдениетті тәрбие құралы ретінде пайдалану жас буынның бойында жауапкершілік, тәртіп, табандылық пен ортақ іске құрмет сезімін қалыптастыруға ықпал ететіні айтылды.

Жиын қорытындысында штаб төрағасының орынбасары Б. Әбенұлы тиісті мекеме басшыларына нашақорлықтың алдын алу және есірткі бизнесіне қарсы іс-қимыл жұмыстарын күшейтуді тапсырды. Сонымен бірге жастармен жүргізілетін түсіндіру шараларын жандандыру, олардың спорттық және мәдени іс-шараларға қатысу мүмкіндіктерін кеңейту, қоғамдық қауіпсіздікті қамтамасыз ету бағытындағы жұмыстарды жүйелі ұйымдастыру жөнінде нақты міндеттер жүктеді.

Жастардың бос уақытын мазмұнды ұйымдастыру, олардың спортқа, өнер мен мәдениетке қызығушылығын арттыру – салауатты әрі саналы ұрпақ тәрбиелеудің маңызды тетіктерінің бірі. Сондықтан бұл бағыттағы жұмыстардың тұрақты жүргізілуі мен белгіленген міндеттердің орындалуы бақылауда болады.

«ANYQ.KZ»-ақпарат.

Ad Widget

Recommended For You