Түркістаннан Павлодар облысының Баянауыл ауданына қасиетті Тайқазанның макеті тарту етіліп, Мәдениет үйінің алдына орнатылды. Сырттай қарағанда бұл – тарихи жәдігердің көшірмесі ғана. Алайда оның астарында ел тарихын, ұлттық құндылықты және Қазақстанның әр қиырындағы ағайын арасындағы рухани сабақтастықты жалғайтын терең мән жатыр.
Қасиетті Тайқазан Қожа Ахмет Ясауи кесенесімен және Түркістанның мыңжылдық тарихымен тығыз байланысты. Сондықтан оның макетінің Баянауыл төріне шығуы киелі шаһардың мәдени мұрасын өзге өңірлерге танытудың бір жолы ғана емес, тарихи құндылықтарды халыққа жақындата түсетін тағылымды қадам болды. Енді Баянауыл тұрғындары мен ауданға келетін қонақтар Түркістанның рухани әлемімен байланысты осы нышанды тамашалай алады.
Тайқазан макеті кесенеде сақталған тарихи түпнұсқамен бірдей өлшемде жасалған. Биіктігі – 158,3 сантиметр, ернеуінің диаметрі – 243,4 сантиметр. Салмағы 2 тоннаға жетсе, сыйымдылығы 3 мың литрді құрайды. Оның алып тұлғасы мен көркемдік ерекшелігі жәдігердің тарихи салмағын айқын сезіндіреді.
Қазақ үшін Тайқазан – жай ғана көне бұйым емес, береке мен бірліктің, рухани сабақтастықтың белгісі. Осы тұрғыдан алғанда, оның Баянауылға тарту етілуі екі өңірдің арасындағы байланыстың мәдени сипатпен ғана шектелмейтінін көрсетеді. Бұл – бір елдің әр өңірін ортақ тарих пен ортақ құндылықтар арқылы жақындастыратын символдық қадам.
Екіжақты ықыластың тағы бір көрінісі бұған дейін байқалған. Мемлекет басшысының «Таза Қазақстан» жалпыұлттық экологиялық акциясын қолдау мақсатында Баянауыл өңірінен Түркістанға 50 түп қарағай көшеті жеткізіліп, облыс орталығындағы «Заң мен тәртіп» саябағына отырғызылған болатын. Бір өңірден ұлттық мұраның белгісі жеткізілсе, екінші тарап туған өлкенің табиғи байлығын тарту еткен бұл бастамалар өзара құрметтің мазмұнын кеңейте түсті.
Бүгінде Қазақстан өңірлерінің арасындағы байланысты тек экономикалық жобалармен өлшеу аздық етеді. Мәдениет пен тарихты, табиғат пен ортақ құндылықтарды арқау еткен осындай бастамалар ел ішіндегі байланыстың рухани негізін күшейтеді. Тайқазанның Баянауыл төріне қойылуы да – осының айғағы.
Түркістаннан бастау алған бұл тарту ұлттық мұраны кеңінен танытуға жол ашып, Баянауыл мен Түркістан арасындағы мәдени көпірді бекемдей түспек. Ал мұндай игі дәстүрдің жалғасуы өңірлер арасындағы достықты тереңдетіп, ел бірлігін нығайта берері анық.
“ANYQ.KZ”-ақпарат.
