Сауран ауданы әкімдігі аппаратының мәжіліс залында аудан әкімі Ғани Рысбековтың төрағалығымен аппараттық мәжіліс болып өтті. Мәжіліске аудан әкімінің орынбасарлары, ауылдық округ әкімдері, дербес бөлім басшылары қатысты. Бұл жөнінде Сауран ауданы әкімдігінің баспасөз қызметі хабарлады.
Мәжілістің күн тәртібіне сәйкес, 4 мәселе қаралды. Сонымен, алғаш болып Сауран ауданы бойынша жеке инвестиция көлемін арттыру мақсатында атқарылған жұмыстардың барысы туралы аудандық кәсіпкерлік және туризм бөлімінің басшысы Б.Шәріпбеков баяндама жасады. Баяндамашының мәлімдеуінше, Сауран ауданының әлеуметтік-экономикалық дамуын бейнелейтін 59 индикатор мен 5 көрсеткіші кәсіпкерлік және туризм бөліміне қарасты. Соның ішінде негізгі капиталға салынған инвестициялар нысаналы индикаторына кіреді. 2022 жылғы қаңтар-қыркүйек айларында негізгі капиталға 12,8 млрд. теңге инвестиция бағытталған. 2021 жылмен салыстырғанда 166,7%-ға артып отыр. Жыл басынан бері қаңтар-қыркүйек айларында жеке инвестициялар көлемі 8,0 млрд. теңгені құраса, бұл былтырғы жылмен салыстырғанда 37,5%-ға жоғары болып отырғанын жеткізді. Бөлім тарапынан көрсеткішке қол жеткізу үшін қазіргі уақытта ауылдық округ әкімдіктерімен аудандық ауылшарушылық, құрылыс, сәулет және қала құрылысы бөлімдері тарапынан бірқатар жобалар бойынша есеп тапсырған. Нәтижесінде ағымдағы жылдың 2 қарашасына дейінгі 10 айлық көрсеткішімен ұлттық статистика бюросы департаментіне 2,7 млрд. теңге инвестиция тапсырғанын атап өтті.
Мәжілісте сонымен қатар, күн тәртібі бойынша аудан бюджетінің 1 қарашаға дейінгі атқарылуы туралы және 9 айдың қорытындысы мен әлеуметтік экономикалық даму мен нысаналы индикаторларының орындалуы туралы аудандық экономика бөлімінің басшысы И.Мирзахметов, Сауран ауданы бойынша әскери қызметке шақыру жұмыстарының барысы туралы Кентау қаласының қорғаныс істері жөніндегі бөлімінің басшысы Н.Дүйсебаев, ауданда мүгедектігі бар адамдарға қол жетімді орта қалыптастыру, ғимараттарды бейімдеудің барысы туралы және жұмыс беруші мен жұмыскер арасындағы еңбек шарттарын порталға енгізу жұмыстарының барысы туралы аудандық жұмыспен қамту және әлеуметтік бағдарламалар бөлімінің басшысы Д.Асылбек баяндама жасады.
Мәжіліс барысында аудан әкімі Ғани Рысбеков күн тәртібінде қаралған мәселелер бойынша нақты тапсырмалар беріп, орын алған кемшіліктерге жол берген бірнеше бөлімдерге шара көру жөнінде нақты тапсырма берді.
Инвестиция дегеннен шығады, тұтастай алғанда Түркістан облысында инвестиция тарту жұмыстары күшейтілмекші. Облыс әкімі Дархан Сатыбалдының төрағалығымен өткен аппарат отырысында өңірдегі индустриалдық және арнайы экономикалық аймақтарға инвестиция тарту жұмыстары талқыланды. Сонымен бірге индустриалдық және арнайы экономикалық аймақтарды инженерлік-коммуникациялық инфрақұрылыммен қамтамасыз ету шаралары және тарифтеріне қатысты түйткілдер де тарқатылдлы. Өңір басшысы бұл саланың маңызды екенін тоқталып, инвестиция тарту ісін жандандыруды тапсырды.
– Жалпы бірінші кезекте индустриалды аймақтардың жер мәселесі және оған қажетті инфрақұрылым бойынша бөлек-бөлек Жол карталарын әзірлеуіміз керек. Кәсіпкерлер мен инвесторлар біздің өңірде электр тарифі арзан емес екенін айтады. Инвесторлармен дұрыс жұмыс істеу қажет. Осыған байланысты тиісті басқармалар мен мекемелерден, басшылардан нақты ұсыныстар күтемін. Аудан, қала әкімдерінің негізгі индикаторларының бірі – инвестиция тарту және жаңа жұмыс орындарын ашу. Осы бағытта жұмысты жандандырыңыздар. Индустриалды аймақтар мен арнайы экономикалық аймақтар кәсіпкерлікті дамытуға ықпал етуі тиіс, – деген Дархан Сатыбалды индустриалды аймақтарды дамыту, жұмыс орындарын ашу мәселелері тұрақты түрде күн тәртібінде тұратынын айтты.
Сонымен бірге ірі компаниялар мен инвесторларға қолайлы жағдай жасап, Түркістан облысына шақыру керектігін жеткізді. Мәжілісте Облыстық энергетика және тұрғын үй-коммуналдық шаруашылық басқармасы, Облыстық инвестиция және экспорт басқармасы, Облыстық құрылыс басқармасы мен Табиғи монополияларды реттеу комитетінің Түркістан облысы бойынша департаментінің және «Оңтүстік Жарық Транзит» ЖШС басшылары мен өкілдерінің пікірлері тыңдалды.
Өңір басшысы электр қуатына қатысты тарифті төмендету және реттеу жөнінде жауапты мекемелермен бірлесе жұмыс істеп, тиімді шешім шығаруды тапсырды. Сондай-ақ индустриалды аймақтарда жұмысты жандандыру, жаңа кәсіпорындарды ашу ісін күшейту жөнінде тапсырма берді. Индустриалды аймақтарды басқаратын компанияларды оңтайландырып, нақты нәтижеге жету жолында жұмыс істеуді жүктеді.
Түркістан облысында 9 индустриалды аймақ бар. Олар Мақтаарал, Шардара, Созақ, Қазығұрт, Түлкібас, Бәйдібек, Ордабасы аудандары мен Түркістан және Кентау қаласында орналасқан. Индустриалды аймақтарда құны 24,054 млрд. теңге болатын және 2614 жұмыс орнын құрайтын 56 жоба орналасқан. Оның ішінде құны 15,542 млрд. теңге болатын және 2087 жұмыс орнын құрайтын 40 жоба іске қосылып, жұмыс атқаруда. Биыл 266 жаңа жұмыс орнын ашуға мүмкіндік беретін 7 жобаны іске қосу межеленген.
Өңірде «TURKISTAN» арнайы экономикалық аймағы жұмыс істеп тұр. Қазіргі таңда 365 гектар өнеркәсіптік аймағының инфрақұрылым жүйелерінің І және ІІІ кезеңдерінің құрылыс жұмыстары жүргізілуде. Мұнда бірнеше жоба жүзеге асыру бойынша нақты келісімдер бар. Алдағы уақытта арнайы экономикалық аймаққа ірі инвесторларды тарту көзделіп отыр.
«ANYQ.KZ»-ақпарат.
