Түркістан облысында ауыл шаруашылығы өнеркәсіп салаларын несиелендіру жұмыстары қарқынды жүріп жатыр. Облыс әкімі Дархан Сатыбалды Сауран ауданындағы өнеркәсіптік парк аймағын аралап қайтты.
Ол «БНК Агро» сүт-тауарлы фермасының құрылыс барысымен танысты. Түркістан облысында құрылысы жүріп жатқан бұл ферма күніне 10 тонна сүт өткізуді жоспарлап отыр. Бұл — тек биылғы меже. Ал келер жылдан бастап бұл көрсеткіш күніне 20 тоннаға жетпек. «БНК Агро» сүт-тауарлы фермасының жалпы қуаттылығы — 1200 бас. Қазіргі таңда мұнда 400-ден астам бас ірі қара Дания елінен әкелінген.
Жалпы құрылысқа 3,3 миллиард теңге жұмсалмақ. Оның ішінде 1,5 миллиард теңге ӘКК тарапынан қаржыландырып жатса, 1,8 миллиард теңге — жеке инвестор қаражаты. Түркістан облысында ауыл шаруашылығы өнеркәсібі салаларын несиелендіру жұмыстары қарқынды жүріп жатыр. Жауаптылар: «Былтыр бұл саладағы жобаларға 6 миллиард теңге бөлінген» — дейді. «БНК Агро» сүт-тауарлы фермасы сол қаражат есебінен қаржыландырылып отыр.
ӘКК бірінші кезеңде несиемен сүт тауарлы ферманы қаржыландырған. Содан кейін су үнемдеу технологиясын пайдаланып, тамшылатып суару, жаңбырлатып суару жүйелері қаржыландырылады. Несие 2,5 пайызбен 10 жылға беріліп отыр. Жеңілдетілген кезеңі де қарастырылған. Мұндай ірі жобаларға бұл өте ыңғайлы несие.
Айта кетсек, «БНК Агро» сүт тауарлы фермасы биыл пайдалануға беріледі деп жоспарланып отыр. Нысан толық жұмысқа кіріскен жағдайда 35 адам жұмыспен қамтылмақ.
Сонымен қатар облыс әкімінің қолдауымен инвестициялық жобаларды арттыру мақсатында Түркістан облысының Сауран ауданында «Өндірістік парк» құрылысы жүргізілуде. Өндірістік парк 30 гектар жерде орналасқан және жалпы көлемі 66 мың мың шаршы метрді құрайтын парк аумағында 42 ғимарат салу жоспарланған. Жалпы Өндірістік парктің құны 13 миллиард теңгені құрайды және оның құрылысы аяқталғанда 1 теңге бюджеттік қаржыға шамамен 7,5 теңге жеке инвестиция тартылуы күтілуде. Қосымша 70 гектар жер телімі анықталып, ұлғайту жоспарлануда. Маңызды жоба Түркістан облысының әкімі Дархан Сатыбалдының жіті бақылауымен жүзеге асуда. Өңір басшысы құрылыс барысын бақылап, жауаптыларға бірқатар тапсырмалар жүктеді.
Өндірістік парктер аумағында әкімшілік ғимаратын салу да жоспарда бар. Ғимаратта парк қатысушылары өндірген өнімдерінің көрме залы ұйымдастырылатын болады.
Ауқымды құрылыс «Түркістан» әлеуметтік корпорациясы және жеке инвестор есебінен жүргізілуде. Маңызды жоба 3 кезеңмен жүзеге асырылылады. Бірінші кезеңде 10 ғимараттың құрылысы аяқталып, 23 мың шаршы метр қолданысқа берілді. Бір ғимараттың жалпы ауданы 1 584 шаршы метрді құрайды. Бүгінгі таңда 6 жоба іске асырылып 30,7 миллиард теңгеге инвестиция тартылған және 550 жаңа жұмыс орны құрылуда.
Қазіргі уақытта Өндірістік алаңында жұмыс жасап жатқан бірқатар кәсіпкерлер бар. Елімізде алғаш ашылған су үнемдеу технологияларын енгізіп, жаңбырлатып суару және тамшылатып суару жүйелерін шығаратын «BNK Group» ЖШС кәсіпорны осында орналасқан. Жалпы инвестиция құны 11,1 миллиард теңгені құрады. Түркістандық 100 тұрғын жаңа жұмысқа орналасты.
«Aqniet Holding» ЖШС (инвестиция құны 3,1 миллиард теңге, 100 жаңа жұмыс орын) мектепке арналған жиһаздар мен медициналық жиһаздарын өндіретін кәсіпорны, украиналық «UBC Group» компаниясы (инвестиция құны 10 миллиард теңге, 350 жаңа жұмыс орын) өнеркәсіптік тоңазытқыштарды өндіретін кәсіпорны парк аумағында өз жұмыстарын бастап жатыр. Бұдан бөлек, медициналық өнімдер, бөлме аралық есіктер және тағы басқа өнімдерді шығаратын кәсіпорындар да жұмысын бастауда.
Ауқымды құрылыстың екінші кезеңінде осы жылы жалпы аумағы 25 мың шаршы метр болатын 12 ғимарат салу жоспарлануда. Аталған ғимараттарға инвесторлар іріктелініп алынды, құрылысы аяқталған соң 1000 жаңа жұмыс орны ашылады (инвестиция құны 32,3 миллиард теңге).
Ал үшінші кезеңде, 2025 жылы 14 ғимаратты іске қосу жоспарланып отыр. Кәсіпкерлер инженерлік инфрақұрылымы жүргізілген, құрылысы дайын өндіріс орындарына қызығушылық танытатыны күмәнсіз.
Өндірістік паркті құру мақсаты – әртүрлі көлемдегі өндірістік компанияларды тарту арқылы (оларға қажетті тиімді, инновациялық өндірістік қуаттар мен заманауи форматтағы қойма үй-жайлар) олардың өзара әрекеттесуі негізінде үйлесімді өндірістік орта құру. Бұл ретте, өндірістік парктерді құру шикізаттық емес секторды дамыта отырып, өндірістің инновациялық дамуына мүмкіндік береді.
«ANYQ.KZ»-ақпарат.
