Шымкент қаласының әкімі Мемлекет басшысының Жолдауында жүктелген міндеттерді нақтылады

Loading

Шымкент қаласының әкімі Ғабит Сыздықбековтің төрағалығымен Қазақстан Республикасының Президенті Қасым-Жомарт Тоқаевтың «Қазақстанның жаңа тарихи кезеңдегі өзекті міндеттері» атты Жолдауын талқылауға арналған қалалық актив отырысы өтті. Жиында Мемлекет басшысы айқындаған стратегиялық басымдықтар, елдің алдағы даму міндеттері және оларды қала деңгейінде жүзеге асыру мәселелері кеңінен қаралды.

Отырысқа жергілікті атқарушы және өкілді органдардың басшылары, зиялы қауым өкілдері, саяси партиялар мен қоғамдық ұйымдардың мүшелері қатысты. Басқосу барысында қоғамның түрлі саласында қызмет атқарып жүрген азаматтар Президент Жолдауындағы негізгі бағыттарға қатысты ой-пікірлерін білдіріп, қаланың әлеуметтік-экономикалық дамуына байланысты ұсыныстарын ортаға салды.

Жиынды ашқан қала әкімі Мемлекет басшысының Жолдауы еліміздің жаңа тарихи кезеңдегі даму бағдарын айқындайтын маңызды стратегиялық құжат екенін атап өтті. Онда белгіленген міндеттер экономиканы нығайту, инфрақұрылымды жаңғырту, инвестициялық белсенділікті арттыру және халықтың өмір сүру сапасын жақсарту бағытындағы жұмыстарға тың серпін беруге тиіс. Осыған байланысты Президент тапсырмаларын жергілікті деңгейде жүйелі жүзеге асырып, әрбір бастаманың нақты нәтижесіне басымдық беру қажеттігі айтылды.

Ғабит Сыздықбеков қаланың алдағы дамуында әлеуметтік инфрақұрылымды жетілдіру, тұрғын үй құрылысын жалғастыру, көлік және энергетика жүйелерінің мүмкіндіктерін кеңейту мәселелерінің маңыздылығына тоқталды. Сонымен қатар инвестиция тарту, кәсіпкерлікті қолдау және Шымкенттің өнеркәсіптік әлеуетін арттыру бағыттарына ерекше назар аударды. Бұл салалардағы жұмыстар қаланың экономикалық мүмкіндіктерін кеңейтіп қана қоймай, жаңа жұмыс орындарын ашуға, тұрғындарға қолайлы жағдай жасауға және қалалық ортаның сапасын жақсартуға ықпал етеді.

Жиын барысында қалалық Қоғамдық кеңестің төрағасы Бұхарбай Парманов, Қазақстан Халық кеңесінің мүшесі Әбдез Иманқұлов және Шымкент қаласы Кәсіпкерлер палатасының директоры Сабира Адамбекова сөз сөйледі. Олар Жолдаудың негізгі бағыттары бойынша пікірлерін білдіріп, өзекті мәселелерді көтерді. Сондай-ақ тиісті салалардағы жұмысты жетілдіруге, мемлекеттік саясаттың басымдықтарын өңірлік деңгейде іске асыруға қатысты ұсыныстарын жеткізді.

Талқылау барысында айтылған пікірлер мен ұсыныстар қаланың даму міндеттерін айқындау тұрғысынан маңызды болды. Өйткені Президент Жолдауында белгіленген мақсаттарға қол жеткізу мемлекеттік органдардың ғана емес, қоғамның барлық өкілдерінің ортақ жауапкершілігін талап етеді. Бұл ретте жергілікті билік пен қоғамдық институттар арасындағы өзара іс-қимылды нығайту, азаматтардың ұсыныстарын ескеру және қабылданған шешімдердің орындалуын қамтамасыз ету маңызды.

Жиынды қорытындылаған қала әкімі Ғабит Сыздықбеков Шымкенттің алдағы даму бағыттарына тоқталып, таяу жылдарға арналған жоспарларымен бөлісті. Мемлекет басшысы жүктеген міндеттерді орындау барысында жүйелі жұмыс жүргізіп, белгіленген басымдықтарды нақты істермен ұштастыру қажеттігін атап өтті. Қаланың тұрақты дамуы, тұрғындардың әл-ауқатын арттыру және инфрақұрылымдық мүмкіндіктерін кеңейту бағытындағы жұмыстар алдағы кезеңде де жалғасын табады.

“ANYQ.KZ”-ақпарат.

Ad Widget

Recommended For You