Түркістан қаласында әлеуметтік қолдауды қажет ететін азаматтарға арнаулы қызметтерді үй жағдайында көрсетуге ерекше мән беріліп келеді. Бұл бағыттағы жұмыстарды қалалық жұмыспен қамту және әлеуметтік бағдарламалар бөлімінің Үйде әлеуметтік көмек көрсету бөлімшесінің мамандары жүзеге асырады. Олардың негізгі міндеті – қызмет алушылардың күнделікті тұрмысын жеңілдетіп, әлеуметтік ортаға бейімделуіне және өмір сүру сапасын жақсартуға қолдау көрсету.
Қазіргі таңда бөлімшеде 35 маман еңбек етеді. Оның ішінде бір бөлімше меңгерушісі, екі кеңесші және 32 әлеуметтік қызметкер бар. Әр маман қызмет алушылардың санатына қарай бекітіліп, олардың жеке қажеттіліктеріне сәйкес көмек көрсетеді. Атап айтқанда, бес әлеуметтік қызметкер жеке басты қарт азаматтарға, 27 маман мүгедектігі бар балаларға қызмет көрсетеді.
Бүгінде бөлімшенің есебінде 160 азамат әлеуметтік қызметтермен қамтылған. Оның 36-сы – жалғыз басты қарт зейнеткерлер мен мүгедектігі бар азаматтар болса, 104-і – 18 жасқа дейінгі мүгедектігі бар балалар. Сонымен бірге 18 жастан асқан мүгедектігі бар 20 азаматқа да тұрақты түрде әлеуметтік қызмет көрсетіледі.
Әлеуметтік көмек бір ғана тұрмыстық қажеттілікті өтеумен шектелмейді. Қызмет алушылардың жеке жағдайы мен сұранысына қарай оларға әлеуметтік-тұрмыстық, әлеуметтік-медициналық, әлеуметтік-психологиялық, әлеуметтік-педагогикалық, әлеуметтік-еңбек, әлеуметтік-мәдени, әлеуметтік-экономикалық және әлеуметтік-құқықтық бағыттар бойынша арнаулы әлеуметтік қызметтер ұсынылады.
Мұндай кешенді қолдаудың мәні зор. Өйткені кейбір азаматтар үшін күнделікті тұрмыстағы қарапайым қажеттіліктерді өтеудің өзі сыртқы көмекті талап етеді. Ал балаға көрсетілетін әлеуметтік қызмет оның денсаулығы мен жас ерекшелігіне байланысты жеке тәсілді қажет етеді. Сондықтан мамандар әр қызмет алушының жағдайын тұрақты бақылауда ұстап, көрсетілетін көмектің мазмұнын оның нақты қажеттілігіне қарай ұйымдастырады.
Арнаулы әлеуметтік қызметтердің басты мақсаты – азаматтардың өмір сүру сапасын арттырумен қатар, олардың әлеуметтік ортаға бейімделуіне ықпал ету, күнделікті тұрмыстық қажеттіліктерін қамтамасыз ету және құқықтары мен заңды мүдделерін қорғауға қолдау көрсету.
Бұл ретте әлеуметтік қызметкердің еңбегі кәсіби міндеттермен ғана өлшенбейді. Оның жұмысы тұрақты назарды, жауапкершілікті және адамға деген жанашырлықты қажет етеді. Әсіресе, жалғыз тұратын қарттар мен ерекше қолдауды қажет ететін балалар үшін әлеуметтік қызметкердің көмегі күнделікті өмірдің маңызды бөлігіне айналады.
Үйде әлеуметтік көмек көрсету бөлімшесінің жұмысы азаматтардың әлеуметтік әл-ауқатын жақсартуға, қоғаммен байланысын нығайтуға және қолайлы өмір сүру жағдайын қалыптастыруға бағытталған. Бөлімше мамандарының жүйелі еңбегі әлеуметтік қорғау саласындағы қолдаудың адамға барынша жақын әрі нақты қажеттілікке негізделген түрде көрсетілуіне мүмкіндік беріп отыр.
“ANYQ.KZ”-ақпарат.
