Өткен қыста Екібастұз бен Риддер қалаларында орын алған апатқа байланысты бүкіл елімізде жылу жүйелерін жаңартуға баса назар аударылып отыр. Осыған орай Шымкент қалалық энергетика және инфрақұрылымды дамыту басқармасының өкілдері жылу қазандықтарының жұмысымен таныстырды.
— Шымкент қаласы бойынша барлығы 824 шақырымға жуық жылу желілері құбыры бар. Оның 152 шақырым магистральдық жылу желісі болса, 672 шақырымға жуығы ішкі орам жылу желісі. Сонымен қатар, «Қуатжылуорталық-3» кәсіпорынның жылу желілерінде 23 бірлік қазандық пен 17 бірлік сорғы станциясы орналасқан. Өткен 2022 жылы Шымкент қаласында жылу жүйелерінің 50 учаскісінде ішкі орамдық ағымдағы жөндеу жұмыстары жүргізілді Бұл жылу желісінің тозуын 38,2 пайыздан 37,3 пайызға дейін төмендетуге, сондай-ақ, тұтынушыларға берілетін жылу энергиясының сапасын арттыруға мүмкіндік берді, – дейді Шымкент қалалық энергетика және инфрақұрылымды дамыту басқармасы басшысының орынбасары А.Әбдіқалықов. Оның айтуынша, биыл Шымкент қаласында жылу жүйелерін жөндеу және жаңарту жұмыстары 4 нысан бойынша жалғасын табады. Қазір қала аумағындағы жылу құбырларын ретке келтіру бойынша іс-шара жоспары мен штаб құрамы бекітілді. Қаланың 2023-2024 жылдардағы жылу беру маусымына дайындық жұмыстарының барысы бақылауға алынып, бекітілген іс-шара жоспарына сәйкес апта сайын тұрақты мониторинг жүргізілетін болады.
Айта кетейік, 2022 жылдың жылу беру маусымынан кейін 838 шақырым жылу жүйелерін тексеру барысында 79 ақау анықталған.
Өткен жылдың қорытындысымен қала тұрғындарының көмірге қажеттілігі 66 мың тонна, бүгінгі күнге дейін қалаға 100,8 мың тонна көмір тасымалданған, қоймаларда 35 мың тонна көмір қоры бар. Ал, инфрақұрылым жүйелерінің дайындығы 90 пайызды құраған болаты.
